Dr. Joachim Gunsalam
KOTA KINABALU: Kumoduo Boyoon Montiri II, Datuk Seri Dr. Joachim Gunsalam minogolim poinsotol totondos i pinopikawit disio di ‘skandal’ susuap kopohompit kapanahakan lisin perlombongan (pongukadan) mineral id Sabah.
Totondos dilo’ i pinoruput do protal Malaysiakini, komoyon di Dr. Joachim sabaagi iso’ totondos i aiso’ tinonggungan om kituduan araat.
“Olimon ku do poinponu’ o totondos i popisawit doho id skandal susuap kohondot lisin pongukadan mineral id Sabah miagal di pinoruput do portal Malaysiakini,” ka disio id iso’ kointalangan media di tadau baino’.
“Nokito ku ruputan dilo’ sabaagi aiso’ kopio tinonggungan om kituduan araat montok mongumpadan ngaran ku di osonong.”
Dr. Joachim po nogi’ Montiri Koporintaan Koiyonon om Pomuwalaian Sabah om Ponowoli Presiden Parti Bersatu Sabah (PBS) minoboros, amu’ isio kasansala’ mantad karaja’ dau sundung pia do haro inggisaman montok paparaat do ngaran disio.
“Amu’ oku oinggangahan di pogumbalan papaatu’ doho’ om tumilombus tumopot popoindalan tonggungan ku sabaagi puru Kabinet Pogun Sabah om Puru Lintuhun Undangan Pogun (ADUN) Kundasang do poinbobos sinonong,” ka disio pinoposotol.
Pinokianu nogi’ disio oinsanan puru om mononokodung PBS mooi do toririmo tumoronong, misompuru om moningkanan doid kopotilombusan poburuon parti kumaa rayat.
“Sabaagi Ponowoli Presiden, pokionuon ku oinsanan puru om mononokodung PBS do tumilombus otoronong, misompuru om moningkanan. Tilombuson kumaraja’ ogoris montok rayat. Kakal ogumu’ i nuru’ do powonsoiyon. Nuru’ tokou tumilombus mokinongou, mogihum liwang koponginsonongan om minggisom mogowit koburuon kumaa pogun koupusan tokou,” ka disio.
Dr. Joachim nga’ minanahak jominan do toguangon disio koyuon diti miampai poinponu’ kinotoronongon om ginawo di opulang, om mamagatang sokodung po’ompus mantad rayat.
“Kotumbaya’ai no, toguangon ku koyuon diti miampai ginawo di otoronong om guang di opulang. Unsikohon ku sokodung om kotumbayaan po’ompus mantad rayat,” ka disio.
