Cyril (poindikau koduo, gibang) guminambar miampai finalis om wookon mimparagat seni i nokotindapou.
KOTA KINABALU: Gaa’ Sinding SABAHVfm 2025 Musim Koduo onjuran Koupisan Kosolimbahan Malaysia (RTM) Sabah popouyu ginumu’ koinsanai tutungkap tusin tunui RM48,000.
Ka di Kumoduo Potunud Kosolimbahan Sabah, Ts. Cyril Simon, ginumu’ dilo’ nokoinsawat RM20,500 nung piadangon di RM27,500 i pinouyu id edisi kumoiso’ di toun 2023.
“Bontugan Gaa’ Sinding SABAHVfm 2025 karamit tutungkap tusin tunui RM6,000, naamot kalantoi kategori ‘Vokal Terbaik’, ‘Persembahan Terbaik’, om Monunurat Roiton Bobos Osonong sopipoopori koowit muli’ RM2,000,” ka disio id kapahabaran media ababayan dilo’ do hiti di konihab.
Pinointalang disio, bontugan montok kategori Kadazan, Bajau, Murut om Dusun karamit RM4,000 tikid kategori, naamot timbang bontugan mogowit muli’ RM3,000, om koiyonon kotolu RM2,000 montok tikid kategori.
“Gaa’ i kikonsep pomolihis pokikitanan sinasawat diti ompoton do piomungan monguni-unit mantad Lorsama Orkestra Angkasapuri om Kombo RTM Sabah, manahak wotik kumaa ababayan i piindad-indadan tongo’ rohian tuunion tinaru nokoiyonon.
“Soginumu’ 12 sinding bobos osonong ponongkiala’an, pinili’ mimpuun timpu wulan Kolimo 2024 gisom wulan Kolimo 2025, kaampai tolu sinding bobos osonong mantad tikid boros ilo’ nopo nga’ Kadazan, Bajau, Murut om Dusun. Pinomilian winonsoi tumanud sinonong pinoniipan, tempo, nogi’ nuludan tuunion di panel magagadang RTM Sabah,” ka disio.
Ka di Cyril, Gaa’ Sinding SABAHVfm 2025 kosolimbou mitilombus maya’ kosolimbahan Murut om okito nogi’ maya’ ‘penstriman’ mitilombus id aplikasi RTMKlik, Facebook RTM Sabah, om SABAHfm. Suai dilo’, posolimbahon po nogi ilo’ do mogiandad id apat stisin rodiu ilo’ nopo nga’ SABAHfm, TAWAUfm, SANDAKANfm om KENINGAUfm.
Wookon ginalis i monongkiala’ kaampai no i Lyron Felix, Presley Petrus, nogi’ io’ Elden Isos & Esther D. Kimsrong (Kategori Kadazan); Rozainie Rozali, Tantiana Tukiman dan Mohammad Hud Lufti Jamail (Bajau); Syamson Tingkalur & Afiezal Fahmi Inggu, Anjee Afirra Laijih, om i Sitipah Jahamin (Murut); nogi’ i Wirona Malun, Norzizi Safira Iddy, om i James Sami (Dusun).
Ababayan dilo’ kapanau id Lintuhun Hongkod Koisaan otindapou nogi’ di Boyoon Montiri Sabah, Datuk Seri Haji Hajiji Haji Noor sabaagi tombului apantang.
Nokotindapou nogi’ id kapahabaran media dilo’ i Mongungulud SABAHVfm Ruskap Muharam, Luguan Monguhup Potunud Ababayan Rodiu, Aritika Mabni @ Matbee om Monijor Agayo Hotel Ming Garden Wei Gang.
