Hajiji sinuau do mogigiyon kampung id kinorikotan doid Ramai Mongukab Puasa Lansanon Miampai Rayat Lintuhun Undangan Pogun (DUN) N.13 Pantai Dalit.
TUARAN: Boyoon Montiri, Datuk Seri Haji Hajiji Haji Noor pinoposotol do amu’ isio insan umbal popointutun tinan po’ompus nosili boyoon montiri pointonod kikiro limo toun nakatalib.
Minoboros isio, i nopo oponsol nga’ popointutun Palan Koburuon Sondikoton Sabah Maju Jaya (SMJ) sabaagi impohon om puralan koporintaan buruanon disio do popoburu’ Sabah.
“I nopo haro id pomusarahan ku nga’ montok popoburu’ Sabah, minggisom mongingkawas nindopuan pogun mantad RM4 bilion om noondo nokosigampot no do RM7 bilion, om nogi’ toun diti asil tokou pikikiro kosigampot somok RM8 bilion.
“Nung komilo tokou mongulud pogun, osigampot dati’, haro o katatapan tokou osuau papaapu’, tulun rumikot mantad suang om labus pogun mongukab pongindopuan, kilang. Nung kokito yolo’ koporintaan pogun aiso’ palan, pulitik amu’ aadang hinombo doti’ do rumikot yolo’.
“Soira’ diolo’ do rumikot, ikonomi tokou koburu’ om ogumu’ kosiwatan pakarajaan montok rayat di kaharo dati’, rinibuan gisom hinadapan noribu, iti i winonsoi dati’.
“Binsoroho’ nung amu’ tokou koilo momorinta’, haro di gulu lansanon i mongomi do abaal yau ikonomi, nga’ kaanu popowonsoi nunu-nunu. Mimboros nopo pulitik hilo pulitik hiti, mamanau hilo’ mamanau hiti, momutul komponi konsesi, mogisusuai po winonsoi dau, aiso’ suai, id ginawo diolo’ ilo’ no,” ka disio.
Minoboros isio dilo’ id Ramai Mongukab Puasa Lansanon Miampai Rayat Lintuhun Undangan Pogun (DUN) N.13 Pantai Dalit id luan Masjid Nur Falah, Kampung Mengkabong do hiti di tadau baino’.
Nokotindapou nogi’ Monguhup Montiri Koburuon Labus Kakadayan, Datuk Samad Jamri, Puru Lintuhun Undangan Pogun (ADUN) Pantai Dalit, Datuk Jasnih Daya, ADUN Tempasuk, Datuk Arsad Bistari, Luguan Upisor Eksekutif Tinimungan Sawit Kinabalu, Datuk Victor Ationg om lansanon mogigiyon koiyonon.
Ka di Hajiji, sopisuai di koporintaan nokopogulu, koporintaan buruanon dau amu’ insan paganu laang di kopomorugi’ pogun soira’ minonowoli kopoindalanan koporintaan.
“Orugi’ tokou nung momonsoi miagal dilo’, nga’ yolo’ di gulu momutul komponi konsesi waig, haro onom toi turu’. Orugi’ tokou mambayar RM315 riong ‘for nothing’ (do aiso’-aiso’) sabab ponuhuan kuut, ilo’ karaja’ diolo’,” ka disio.
Hajiji pinapatahak toluod kuminaa tinimungan asnaf id Ramai Mongukab Puasa Lansanon Miampai Rayat Lintuhun Undangan Pogun (DUN) N.13 Pantai Dalit.
Kohondot dilo’, pinokianu disio rayat pogun diti do komilo monumpili’ osonong araat om minsingilo mantad susuyan kaantakan laid pogun diti montok no monilombus kaadangon pulitik.
Ka disio, otumbayan isio, koporintaan Gabungan Rakyat Sabah – Pakatan Harapan (GRS-PH) Plus i haro do noondo insan po kaanu monuridong koporintaan katalib Pomilian Agayo Pogun Ko-17 (PRN17) obontol.
“Onuan oku no sokodung om otumbayaan oku id Pantai Dalit diti kalantoi tokou miampai majoriti di kopoondos, nunu podii susuyan id Sulaman om opurimanan ku apat koiyonon DUN id Tuaran okon nopo ko’ Sulaman om Pantai Dalit, nga’ nogi’ Tamparuli om Kiulu pointatap pasanganu GRS.
“Aiso’ pilion tokou, aiso’ nunu winonsoi diolo’ (pembangkang) di gulu, sondikoton nga’ aiso’. Rayat kada’ kaampawong di susuyan ayamut om totondos lansanon pembangkang, aiso’ karaja’ diolo’ do suai, tikid tadau ilo’ nopo,” ka disio.
Naamot dilo’, Hajiji po nogi’ ADUN Sulaman minoboros, kobolingkahangan kosolotan talun-alun i nosili bobohiton moomoguno, kosuul no id waya’an mantad Binturugon Berungis gisom T-Junction, do hiti asalasai soira’ do opongo projik monginsonong wawaya’an dilo’.
Ka disio, kinopoobian montok projik dilo’ haro no, naamot kuntiriktor nga’ nopili’ no montok popoindalan dilo’ do amu’ no alaid montok manalasai kobolingkahangan kosolotan modtinalib miampai kos lobi RM100 riong.
“Haal diti asaru’ oroitan di Jasnih sabaagi ADUN Pantai Dalit kumaa doho’ om sabaagi koporintaan i kitonggungan om sabaagi Boyoon Montiri mantad Tuaran, haal miagal dilo’ nosili tingkananon ku.
“Minanahak oku ogumu’ sokodung okon nopo ko’ kumaa Pantai Dalit, nga nogi’ Tamparuli om Kiulu. Iti i winonsoi tokou sabaagi koporintaan, tumopot tokou papatantu’ pomorintaan koporintaan oulud miampai osonong,” ka disio.
