Hajiji minintong koyuon songulun bagang om tina’ dau i nasansagan minundaliu gama-gama’ liyud id Beaufort. Nokotindapou nogi’ i Shamsul Iskandar (gibang).
BEAUFORT: Paganakan i noumpadanan gama-gama’ liyud do hiti om id Memabkut nakaramit ponguhupan kousinan aarau-arau soginumu’ RM1,300 mantad koporintaan Pisompuruan om pogun.
Boyoon Montiri, Datuk Seri Haji Hajiji Haji Noor minoboros, mantad ginumu’ dilo’, RM1,000 nopo mantad Kotinanan Ponguludan Kadaaton Negara (Nadma) om RM300 mantad Yayasan Kotundunan Sabah (YKS).
Suai ko’ ponguhupan tusin, tikid paganakan i pinoundaliu kuminaa longkod poundolihan naamot (PPS) nga’ karamit nogi’ ponguhupan takanon.
Hajiji miniboros miampai songulun mantad paganakan i nasansagan pinopoundaliu soira’ walai diolo’ notorob waig id Beaufort.
Boyoon Montiri minoboros dilo’ katalib kuminakap PPS Dewan Datuk Seri Panglima Mohd. Dun Banir, i noondo diti nokopo’iyon 147 paganakan i kapaampai 412 nogompitan do hiti, di tadau baino’.
Turu’ PPS nukaban pointonod liyud nokotimpuun di ko 7tw Kotolu, minanahak kopongumoligan kumaa 1,944 tulun mantad 614 paganakan do hiti.
Id PPS, Boyoon Montiri pinapatahak ponguhupan om monongkirumo di nohompitan liyud.
Hajiji nonuan kopointalangan karait koyuyuon liyud id Beaufort.
“Tuminingan oku do hiti montok ruminuba’ di tongo’ nohompitan liyud om mintong sondiri’ koyuon id kinoiyonon. Pinopoilo oku diolo’ do koporintaan karati di koinggoritan diolo’,” ka disio.
Boyoon Montiri kuminakap nogi’ do watas Kakadayan Beaufort, i kakal notimbuuhan do waig, hinombo do nonuan isio kopointalangan di Upisor Watas, Mohd. Nazri Ajun.
Hajiji minonuhu’ nogi’ do Koupisan Pomuwoigan om Poluyungan montok momurisi’ oinsanan luyungon waig, lolobi no parit ngaawi’ montok popomoomogot liyud id timpu rumasam diti.
Hajiji pinapatahak ponguhupan kuminaa songulun mantad nogompitan liyud i Membakut.
Boyoon Montiri nga’ kuminakap nogi’ id PPS Dewan Kesenian Islam, Membakut, iso’ mantad apat PPS i bukaban id watas dilo’, montok minanahak ponguhupan miagal kumaa tongo’ nogompitan liyud do hilo’.
PPS Membakut noondo pinoporumpos kikiro 278 paganakan kapaampai do 836 nohompitan.
Minananud di Boyoon Montiri i Monunurat Pogun Datuk Seri Sr. Safar Untong, mobi’ rayat om Monunurat Pulitik Otuo Luguan Montiri, Datuk Seri Shamsul Iskandar Mohd. Akin.
