Jahid minamaramit foom upalai kosompuruan PBS mantad di Liew, om poingintong ilo’ AJK Bohogian PBS Tamparuli.
TAMPARULI: Parti Bersatu Sabah (PBS) Bohogian N.14 Tamparuli potitilombus nakaanu sokodung soira’ 18 puru wagu mantad Tenghilan, doros hiti, suminompuru parti dilo’ di konihab.
Tinimungan puru wagu dilo’ binuruan di songulun pinsin koporintaan, Liew Kui Choi i akawas sunduan popoburu’ timpu dumontol pulitik Sabah.
Ka di Liew, kinosompuruan diolo’ id PBS nopo nga’ laang oponsol montok papatantu’ kopotutan om koponsolon rayat kotilombus oobian. Otumbayaan nogi’ isio do lobi kogumu’ sumompuru kopoburuan diti id timpu toruhai.
“PBS nopo nga’ posunduran bobos osonong mongobi’ kopotutan rayat Sabah, kosuul no sukod wagu i orohian kokito kosimbanon di osonong.
“Otumbayaan yahai kopomuruanan id PBS kaanu mogowit koburuon om kasasanangan kumaa mogigiyon,” ka disio.
Foom kosompuruan diolo’ rinamit di Kumoduo Presiden PBS i po nogi’ Luguan Bohogian PBS Tamparuli, Datuk Jahid Jahim.
I koimbayat, kogumuan puru wagu dilo’ kapaampai sukod wagu i kisunduan montok popouhup kumaa kopoburuan PBS nogi’ sumili somboogian mantad susuyan kahandaman parti dilo’.
Naamot dilo’, i Jahid minamaramit kinorikotan diolo’ om minoboros do sokodung di mumu’-gumu’ diti kopokito kotumbayaan rayat kumaa PBS sabaagi parti i po’omus popoburu’ kopotutan rayat Sabah.
“Kinosuangon puru ngaawi’ wagu diti kopokito do PBS kotilombus kosudong om kaanu koiyonon id ginawo rayat.
“Mongunsikou tokou kopio kotumbayaan di pinatahak om kiangkab montok tumilombus popoburu’ montok timpu dumontol di lobi kabantug,” ka disio.
Kawagu di Jahid, PBS Bohogian Tamparuli tumilombus gumaras kumaraja’ id kopoinggirotan sokodung id siriba’ nogi’ popoburu’ ababayan kopotundaan om kasasanangan rayat Sabah.
