Ahmad Rizal (kolimo, gibang) pinopotunui tandamato kuminaa di Malai Ali, sinasi’ di Tun Musa (tanga’).
KOTA KINABALU: Celcom Timur (Sabah) Sdn. Bhd. momorikot piromutan ‘fiber optik’ 13,000km id pototongkop Sabah om Watas Pisompuruan (WP) Labuan dumontol koompokon toun diti, kopiongoi di inggisaman popoinlaab piromutan ‘jalur lebar’ (buris alaab) kumaa rayat pogun diti.
Luguan Upisor Eksekutif Tinimungan Qhazanah Sabah Berhad, Datuk Ahmad Rizal Dahli minoboros, piromutan fiber optik diti do noondo kopuli koinsanai kakadayan agayo id Sabah om masaan poinggoyoon kumaa koiyonon poonsokid nogi’ pomuwalaian.
“Gisom diti, oinsanan kakadayan agayo id Sabah kiharo no piromutan fiber optik. Tingkananon dahai do noondo nopo nga’ popoinggayo kopulion kumaa koiyonon poonsokid om mongingkawas piromutan kumaa koiyonon pomuwalaian.
“Id timpu diti, nokoponigampot yahai kikiro 10,000km piromutan fiber optik, om sondikoton dahai nopo nga’ montok monigampot 13,000km dumontol koompokon toun.
“Toun nakatalib, nakaanu yahai minomoruhang 3,000km fiber optik, minongingkawas ginumu’ koinsanai kuminaa 10,000km. Montok surupukaraja’ Fiber-to-the-Home (FTTH), yahai do noondo nokosigampot 150,000 kinopooputan,” ka disio kuminaa media katalib pinapatahak zakat pongindopuan CT Sabah montok toun 2025 kiginumu’ RM1 riong kuminaa Kounsol Ugama Islam Sabah (MUIS).
Ramai kinapatahakan dilo’ sinasi’ di Molohingon Agayo Pogun Sabah Tun Musa Aman id Istana Seri Kinabalu, di tadau baino’.
Ka disio kawagu, bohogian dau kiangkab montok monilombus rontob ginumu’ zakat pongindopuan montok manahak koundaran kumaa rayat Sabah kosuul kopio tinimungan asnaf.
“Mantad dilo’, lumansan yahai do ‘pattern’ diti kotilombus id timpu dumontol kopiongoi di kinosunion pongindopuan Celcom timus Sabah Sdn. Bhd.
“Gisom diti, ‘estimate’ tokou insyaAllah haro kinoguraon di osonong mantad sunduk ‘development of fiber optic cable’ i pinoindalan id pototongkop pogun om kiangkab nogi yahai do ‘mantain amount’ (monimporon ginumu’ diti’ mooi do kotilombus,” ka disio.
Wookon i nokotindapou id ramai dilo’ i Montiri Sains, Tiknologi om Inovasi Sabah, Datuk Dr. Mohd. Arifin Mohd. Arif, Monguhup Montiri kumaa Boyoon Montiri (Haal Ugama’) Datuk Ruslan Muharam, Kumoduo Molohingon Agayio MUIS Datuk Malai Ali Malai Ahmad, Potunud Celcom Timur (Sabah) Sdn. Bhd. Assan Nasip, Luguan Upisor Eksekutif Zurinah Hanafiah nogi’ Luguan Upisor Eksekutif om Monunurat MUIS, Ramlan Awang Ali.
