Hajiji ontok kuminakap nogompitan kinotutudan id Kampung Cempaka, Likas doid Longkod Pounsdolihan Naamot Nogompitan Kadaaton id Lintuhun Mogisuaiguno Likas.
KOTA KINABALU: Koporintaan Pogun miampai koupisan koporintaan om Dewan Bandaraya Kota Kinabalu (DBKK) papaharo pibarasan kotilombus montok monguhup nogompitan kinotutudan id Kampung Cempaka, Likas, di ko 1tw Kotolu katalib.
Boyoon Montiri (KM), Datuk Seri Haji Hajiji Haji Noor minoboros, sabaagi koporintaan i opusou om opoduli’ rayat, konosipan di nongogompitan kinotutudan diti onuan kopomodulianan, lolobi no id wulan mogkodos diti.
Hajiji pinapatahak ponguhupan tusin om balatak takanon ontok kuminakap nogompitan kinotutudan Kampung Cempaka, Likas.
“Tadau baino’ kikosiwatan oku kuminakap nogompitan kinotutudan id Kampung Cempaka, Likas.
“Opusou tokou kopio om sabaagi koporintaan i opoduli’ rayat manahak tokou ponguhupan kousinan kiginumu’ RM1,300 kumaa Luguan Suang Walai (KIR) nogompitan kinotutudan ilo’ nopo nga’ kiginumu’ RM1,000 mantad dilo’ nopo nga’ mantad koporintaan pogun naamot RM300 po mantad Tinimungan Yayasan Sabah (KYS).
“Minggisom tokou momusorou konosipan nongogompitan kinotutudan diti om orotian tokou lolobi no id timpu wulan mogkodos diti, di amu’ kosimbayanan om koinggoritan diolo’. Ilo’ pogi’, koporintaan miampai bohogian poinhompit minggisom mogihum ralan bobos osonong montok monguhup diolo’ do potilombus.
“Suai ko’ ponguhupan kousinan, koporintaan nga’ manahak nogi’ mogisusuai ponguhupan suai miagal ponguhupan gas om ropuhan mantad Yayasan Kotundunan sabah om balatak takanon mantad Tinimungan Yayasan Sabah,” ka disio katalib kuminakap di nongogompitan kinotutudan Kg. Cempaka, Likas, id Lintuhun Mogisuaiguno Likas, di tadau baino’.
Hajiji ruminuba’ dilo wookon nogompitan kinotutudan Kampung Cempaka, Likas id Longkod Poundolihan Naamot Nogompitan Kadaaton id Lintuhun Mogisuaiguno Likas.
Kinaantakan minsusuab tadau Koonom katatalib dilo’ nokoowit di 511 tulun nogompitan mantad 91 paganakan natagakan iyon-iyonon.
Naamot dilo’, duo longkod poundolihan naamot (PPS) nukaban montok pinopo’iyon di nogompitan kinotutudan ilo’ nopo nga’ id PPS Likas i nokopo’iyon 34 KIR kapaampai 200 mogigiyon naamot PPS Damai soginumu’ 57 KIR om 311 mogigiyon.
Mogisusuai bohogian nga’ minonguhup nogi’ pinapatahak taakanon wookon dilo’ Unit Lansanon Koburuon Mogigiyon (UPPM).
Nongogompitan kinotutudan nga’ nakaramit nogi’ ponguhupan kopogulu soira’ nopo ruminojistor id PPS ilo’ nopo nga’ balatak takanon do Tinimungan Koumoligan Awam Malaysia, pek takanon ‘retort’ om taakanon inumon mantad Koupisan Surupukaraja’ Kotundunan Am.
