Dr. Joachim (tanga’) guminambar miampai lansanon PBS om tombului apantang.
KOTA KINABALU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minongunsub mogigiyon Sabah, kaampai mogigiyon Sina’, do tumilombus monokodung Koporintaan Pogun i buruanon do Gabungan Rakyat Sabah (GRS) montok papatantu’ kaadangon pulitik om koburuon di po’ompus.
Kumoduo Boyoon Montiri II dilo’ pinoposotol do pomorintaan GRS nokosigampot kinomogoton atalang maya’ Palan Koburuon Sondikoton Sabah Maju Jaya (SMJ) om otumbayaan do lobi kogumu’ komogoton aanu monigampot miampai pisompuruan nogi’ sokodung po’ompus.
Dr. Joachim otumbayaan do miampai kaadangon pulitik, Sabah kaanu momit sondikoton kobuuron Sarawak.
“Miagal kogumuan mogigiyon Sabah, kopomuruanan GRS nga’ lumansan montok momit laang do Sarawak id sunduk kaadangon om komogoton,” ka disio ontok minoboros id Ramai Makan Totuong Toun Wagu Sina PBS 2025 id Lintuhun Hakka, do hiti, di kosodop.
Pinosotol disio do GRS moningkanan kumaa kopoindalanan nogi’ kopoingkawasan naangayan koposion montok oinsanan mogigiyon Sabah, amu’ monutun tinaru.
“Minggisom yahai montok mongingkawas naangayan koposion oinsanan mogigiyon Sabah. Ilo’ no misi kopio GRS,” ka disio.
Dr. Joachim pinopointalang do Sarawak nakaramit kopomuruanan di ouli’ pointonod pinonuridongan Malaysia, i nakapasaga’ koburuon nokoindalan oturundus. Sopisuai dilo’, kinosimbanon pulitik i asaru id Sabah nokohimpogong kinomogoton sundung pia pogun diti opuawang do intodonon sandad.
“Id Sabah, asaru’ tokou koolon koporintaan om katatapan tikid limo toi hopod toun. Ilo’ pogi’, sundung dati’ pasanganu ogumu’ intodonon, kakal tokou amu’ nokosigampot kinomogoton miagal Sarawak. Kaadangon pulitik nopo nga’ haal oponsol pogulu dati’ koponigampot koburuon poinginan,” ka disio.
Minamarayou nogi’ isio puruankuasa manganganjur Ramai Makan Totuong Toun Wagu Sina PBS mantad kinalantaion pinapaanjur ababayan dilo’ om pinopohimagon kouhupan lalansanon pomogunan id koposunian pisompuruan.
“Tadau diti, kokito tokou ogumu’ lansanon om koisaan mogigiyon Sina nokotindapou mamaramai Toun Wagu Sina miampai dahai. Monongkounsikou kopio yahai kumaao insanan lansanon pomorunan mantad kinorikotan diolo’,” ka disio.
Nokotindapou nogi’ ii Kumoduo Presiden PBS, Datuk Seri Dr. Yee Moh Chai om Datuk Jahid Jahim; Timbang Presiden Datuk Ruslan Muharam; Monunurat Agayo, Datuk Julita Majungki; Luguan Kopointalangan Datuk Joniston Bangkuai; oinsanan Puru Kounsol Akawas, Presiden Pisompuruan Koisaan Sina Sabah (FCAS), Tan Sri T.C. Goh; Konsul Jeneral Republik Mogigiyon China id Kota Kinabalu, Dr. Huang Shifang; Monunurat Pulitik kumaa Boyoon Montiri, Datuk Dr. Roland Chia; nogi’ Luguan Kopointalangan PBS Api-Api, Yee Tsai Yiew i po nogi’ ponorikohon manganganjur.
