Hajiji miampai lansanon ngaawi’ parti komponen GRS guminambar miampai wookon susumikul i nokotindapou kopihondot Ramai Kinopohimaganan Pomupusan Konvensyen Mahasiswa GRS.
KOTA KINABALU: Koporintaan Pogun manahak subsidi ‘one-off’ RM300 kumaa susumikul i minsingilo id kotinanan pinsingilaan akawas (IPT) koporintaan om swasta id pogun diti, ka di Boyoon Montiri, Datuk Seri Haji Hajiji Haji Noor.
Minoboros isio, ponguhupan miampai one-off dilo’ patahakon kumaa susumikul i minsingilo id suang pgoun do muli’ kumaa kampung sompoopori ontok timpu kararamaian.
“Sabaagi paagalan, susumikul mantad Tawau toi Sandakan nga’ poinsikul id Kota Kinabalu om misulak dilo’, uhupan id one-off subsidi diti. Gunoon potuu diolo’ ponguhupan dilo’ montok pomoli tikit kapal toi bas.
“Kopointaan Gabungan Rakyat Sabah (GRS) buruanon ku nopo nga’ koporintaan i toririmo mokinongou komi rayat. Ilo’ pgoi’ toririmo tokou mokinongou nunu i pokionuon do rayat kaampai no tongo’ susumikul tokou.
“Mogisusuai inggisaman om ponguhupan i pinatahak kumaa rayat kosuul no susumikul nopo nga’ montok mongimbulai ‘modal insan’ di kitoilaan, i monguhup popoburu’ pogun diti do timpu dumontol,” ka disio ontok pinopohimagon Pomupusan Konvensyen Mahasiswa GRS id Raian Hotel do hiti, di tadau baino’.
Hajiji ruminamit ‘Resolusi’ mantad Ponorikohon Ponokotalad Susumikul GRS, Datu Hishamuddin Datu Hasim kopihondot Ramai Kinopohimaganan Pomupusan Konvensyen Mahasiswa GRS.
Boyoon Montiri minoboros, kointalangan osorisid karait ponguhupan subsidi dilo’ kaampai ginumu’ mamaramit ponguhupan noondo diti masaan poindalanon do bohogian di poinggompit.
Daamot dilo’, ka disio, ontok wulan Ramadan nakatalib, pinonguhupan subsidi one-off RM600 pinatahak kumaa susumikul Sabah i minsingilo id IPT koporintaan om swasta doid Semenanjung, Sarawak om Labuan.
“Pogulu diti pinahabar ku kopoindalanan subsidi kapal tumulud i pinungaranan tokou Graduan Rindu Sabah. Maya’ inggisaman diti, susumikul Sabah i minsingilo id Semenanjung, Sarawak om Labuan nakaanu ponguhupan one-off soginumu’ RM600 songulun. Pinonguhupan diti ginuno do susumikul montok muli’ kampung kopihondot karamaian doid suti’ semester,” ka disio.
Daamot dino, Hajiji po nogi’ Ponorikohon GRS, mokianu Ponokotalad Susumikul GRS tumilombus rumuba’ tinimungan susumikul id pogun diti, montok papatantu’ tinimungan dilo’ manahak sokodung kumaa GRS.
Hajiji minaganu gambar miampai wookon susumikul i nokotindapou kopihondot Ramai Kinopohimaganan Pomupusan Konvensyen Mahasiswa GRS.
Minoboros isio, tinimungan omulok nopo nga’ kosili patantu’ kumaa kalantaion GRS id Pomilian Agayo Pogun Ko-17 (PRN-17).
“Mimpau do rikod Suruhanjaya Pomilian Agayo (SPR) di kaawagu, soginumu’ somok 950,000 mongungundi’ omulok (18 gisom 40 toun) i kosili mongungundi’ id PRN17 do toun tiso’.
“Kohondot dilo’, unsubon ku Ponokotalad Susumikul GRS do tumilombus rumuba’ tinimungan susumikul diti. Iti oponsol montok papatnatu’ tinimungan dilo’ manahak sokodung kumaa GRS. GRS nopo nga’ parti i popo’iliu koponsolon tulun omulok id nindikohon di poinsuul.
“I nopo oponsol ponokotalad diti monguhup popotungkayan rayat kosuul no susumikul id IPT karait di katatapan om inggisaman i winonsoi do koporintaan GRS suai ko’ koponsolon kaadangon pulitik montok timpu dumontol mogigiyon om pogun diti,” ka disio.
