Dr. Joachim (koduo, wanan) pinopoungkayut konvoi mimbosikol i binuruan di Toh Puan Norlidah.
KOTA KINABALU: Sawo di Molohingon Agayo Pogun Sabah, Toh Puan Norlidah R.M Jasni minomuruan 1,000 momomosi bosikol kisinodu’ 22.5km.
Ababayan mimbosikol Miampai TYT kopihondot Kapamaramaian Kinouliton Toun Kinosusuon Pinotomod Ko-71 di Molohingon Agayo Pogun Sabah, Tun Juhar Mahiruddin dilo’ pinoungkayut di Kumoduo Boyoon Montiri II Datuk Seri Dr. Joachim Gunsalam id Padang Merdeka di jam ko 7 kosuabon.
Po’ompus ababayan mimbosikol minaya’ pamanahan kisinodu’ 22.5km.
Kinopomosihan dilo’ nokotimpuun id Padang Merdeka minaya’ duo tundorongon (pit stop) ilo’ nopo nga’ Jalan Lintas Kepayan potoguang Kompleks Komontirian Piromutan om id Tisan Rahat Tanjung Aru.
Id kinoundorongon koduo, Toh Puan Norlida nokosiwat do pinopowonsoi ababayan mananom guas kayu ponit ‘sea grape’ id Tisan Rahat Tanjung Aru sabaagi ponokotanda’ suai ko’ popointutun kaparagatan kolidasan maya’ momosi bosikol, kaparagatan panamangan sandad posorili’ nga’ pinokitanan id ababayan diti baino’.
Toh Puan Norlidah (kaapat, gibang) pinopoindalan kapatanaman guas kayu id kinoundorongon koduo.
Id kinorikotan doid Padang Merdeka, tongo’ momomosi pinaraatan do taakanon om linihis di pokikitanan do Dewan Bandaraya Kota Kinabalu, suai ko’ pokikitanan ‘live band’ pinotomod di puru Istana Seri Kinabalu, Irama Simfoni Kinabalu.
Tun Juhar Mahiruddin potilombus dino pinopoindalan kinopomutulan kek om pomurutan tikit kinasip id Astaka Padang Merdeka, pogulu minonongkiad do ababayan.
Tun Juhar (kolimo, gibang) minomutul kek kopihondot Tadau Kinouliton Toun Pinotomod TYT Ko-71.
Nokotindapou nogi’ id ramai dilo’ i Mayor DBKK Datuk Seri Dr. Sabin Samitah, Kumoduo Speaker Lintuhun Undangan Pogun Sabah Datuk Richard Yong om Brigadier Jeneral Datuk Al Hamra Tun Juhar, nogi’ i Monguhup Montiri Kousinan Tan Lee Fat.
