Dr. Joachim (poindikau, tanga’) minongobi’ di Boyoon Montiri guminambar miampai 29 mamaramit Gaa’ Sabah Top Achievers (SATA) 2024.
KOTA KINABALU: Sabah nokopokito do ikonomi dau kiginoris asangal, kopokito kosunion sundung potoguang kaantaban id pipiro toun pototohuri diti, ka di Boyoon Montiri, Datuk Seri Haji Hajiji Haji Noor.
“Nakalantoi tokou id kopoopuan doid siktor ngaawi’ agayo, minongimbayat kopoopuan suang om labus.
“Montok toun 2023, Sabah nokoposurat RM11.34 bilion id kopoopuan, nokoposili dilo’ do kumoturu’ bobos akawas id Malaysia miampai 13.3 pihatus mantad siktor kapamansaian nopo.
“Susuyan kinalantaion diti kopokito kogorison Sabah montok mongimbayat mimparagat pomogunan id mogisuaian pomorunan, mantad pamansaian kitiknologi akawas kumaa produk mimpau ginoris aanu inwoguan, kopokito naangayan pogun diti sabaagi rikoton kopoopuan di koimbayat,” ka disio id Ramai Makan Totuong Gala Gaa’ Sabah Top Achievers 2024 i pinoindalan id Longkod Konvensyen Sompomogunan Sabah (SICC) do hiti, di songkosodop. Boboroson disio binasa’ di Kumoduo Boyoon Montiri II po nogi’ Montiri Koiyonon om Pomuwalaian, Datuk Seri Dr. Joachim Gunsalam.
Ka di Hajiji, tingkananon koporintaan pogun kumaa tolu tukod poimpahan miagal pinoulud id palan koburuon Sondikoton Sabah Maju Jaya (SMJ) i moningkanan kumaa Pomutanaman, Pomorunan om Ponombuluyan; Kopoopuan kumaa Mogigiyon om Mongingkawas Piromutan miampai Ponginsomokan Otomou, nokopo’iliu dati’ id waya’an di kohunung montok popoburu’ Sabah id timpu limo toun mimpuun 2021.
Id haal diti, minoboros isio, mongindapu’, momuruan korporat om ‘inovator’ i nonuan pamantangan id Ramai Gaa’ Gala Sabah Top Achievers papamanau tonggungan oponsol id kinalantaion diti, koposikap komogoton pogun om papatantu’ Sabah kotilombus kosili mongunguhup apagaras om oponsol kumaa ikonomi pomogunon.
“Id timpu dumontol, otumbayaan oku ababayan miagal Sabah Top Achievers 2024 diti koposimbuat nindikohon Sabah, i potuu id nayatan nasional toi ko’ sompomogunan, miampai mongunsikou bakat om susuyan kinalantaion mantad pogun diti. Kalansanan kinalataion dokoyu kounsub kumaa sukod dumontol montok tumonggoi popouhup kumaa kosunion om komogoton Sabah,” ka disio.
