Dr. Joachim (poindikau, tanga’) guminambar pongingitanan om pinapalahat do ‘Bersatu’ katalib nopupusan Ramai Kinopoimaganan Koponguludan Raan Ngaawi’ PBS Bohogian N.17 Darau.
KOTA KINABALU: Parti Bersatu Sabah (PBS) pinopogura’ iso’ bohogian dau di alaid no do amu’ aparagat ilo’ nopo nga’ PBS Bohogian DUN N.17 Darau.
Ponowoli Presiden PBS, Datuk Seri Dr. Joachim Gunsalam pinopoindalan kinopoguraan bohogian dilo’ id Ramai Kinopoimaganan Koponguludan Raan Ngaawi’ PBS Bohogian N.17 Darau id kinoiyonon di Mohamad Yasser Mohamad Yassin, di konihab (14tw Kosiam).
Id boboroson disio, Dr. Joachim minoboros, kosokodung poinponu’ isio kinopoguraan kawagu PBS Bohogian Darau.
“Kiguno tokou misokodung miampai tongo’ parti id Gabungan Rakyat Sabah (GRS) mooi do kouhup popogirot koporintaan noondo diti… haro tonggungan tokou montok monguhup kalantaion GRS.”
Pinoposorou nogi’ isio kumaa oinsanan i orohian sumili puru do PBS nopo nga’ songinan parti kopoburuan om okon ko’ tumanud nopo do pomilian agayo.
Karait do ababayan dilo’, ka di Dr. Joachim, ilo’ nopo nga’ montok popigirot lukug silaturrahim om montok mogi’intutun sompipi’ diolo’.
Minonongkounsikou isio kumaa di Yasser tu’ pinoposodia’ koiyonon om kogogonopan montok kinopoonjuran ababayan dilo’.
Ounsikou nogi’ isio kokito ogumu’ i orohian sumompuru PBS miagal pinokitanan doid ababayan dilo.
Nokotindapou nogi’ tongo’ Puru Kounsol Akawas, tongo’ Luguan Bohogian PBS, Luguan Komulakan PBS, Dr. Christoper mandut miampai Exco Komulakan.
