Haji Hajiji Haji Noor
KOTA KINABALU: Pinonuridongan Malaysia nokoowit ogumu’ kasanangan om koundaran kumaa mogisusuai nayatan mogigiyon id pototongkop pomogunon om pogun diti, ka di Boyoon Montiri, Datuk Seri Haji Hajiji Haji Noor.
Ka disio, Sabah mamagatang kopio kopodulianan Koporintaan Perpaduan kumaa mogigiyon pogun diti.
Minoboros isio, pinamanahan monuridong pomogunon diti kakal anaru, mogikilong-kilong om tantu’ no do kotoguang di mogisuai kaantaban, nga’ tantu’ alantoi monoguang miampai haro pi’isaan, kopogiagalan om pisompuruan mantad no do koponsolon pogun.
Nangatan disio oinsanan mogigiyon Malaysia do mamarati uhu pamaramaian Tadau Malaysia toun diti ilo’ nopo “Malaysia Madani: Jiwa Merdeka”, kokitanan di oponsol kopio montok koburuon om komogoton pomogunon.
“Malaysia Madani i tinukod do onom posunduran agayo kopokito ‘visi’ tokou do monuridong mogigiyon i asangal, oulud om koburu’.
“Jiwa Merdeka, kopokito kosimbayanan mogigiyon Malaysia mantad koulalaho’ araat, koposotol sunduan ‘patriotisme’ om mongupus kumaa pomogunon.
“Ilo’ po nogi’ nga’ kopohompit do pomusarahan, piromutan sosial om ikonomi id inggisaman tokou monuridong songinan koisoon mogigiyon di ogirot om oulud,” ka disio id pason kopihondot pamaramaian Tadau Malaysia Nayatan Kabansaan Toun 2024.
Hajiji minoboros, koyuon ngaawi’ Malaysia Madani kopiongoi di angkab katatapan Sabah Maju Jaya (SMJ) i nosili puralan koporintaan id kopoburuan pogun diti.
Maya’ katatapan diti, koporintaan minggisom popogirot ikonomi, mongingkawas kasasanangan mogigiyon om papagaras kopotundaan di ouli’.
“Piomungan koyuon ngaawi’ Malaysia Madani om Sabah Maju Jaya diti nopo nga’ kopokitanan kinotopoton tokou montok mintong Sabah om Malaysia kotilombus koburu’ id koyuon di otoronong om otunda’.
“Montok dati’ id Sabah, sunduan pisompuruan om pogipapantangan sopitinaru tilombuson momusus id inggisaman gumura’ kumaa toguang. Iti sabab no do pi’isaan om pisompuruan mogigiyon nopo nga’ posunduran do kalantaion Malaysia do poinpuli om nogi’ Sabah.
“Kanou tokou no toinsanan monginggirot sunduan pisompuruan om tumilombus gumaras kumaraja’ montok papatantu’ Malaysia kotilombus sabaagi songinan pomogunon di koburu’, abantug om pantangon id nayatan sompomogunan,” ka disio.
Minoboros isio, pamaramaian Tadau Malaysia kirati kopio kumaa oinsanan mogigiyon Malaysia do momuhondom om mamaramai timpu kisusuyan pogun i naantakan 61 toun di nakatalib.
Ka disio, di timpu dilo’ no nokopikogos pibatosan i nokoposompuru duo watas Sabah, Sarawak om Tana’ Melayu montok minonuridong songinan pomogunan di kibantug om pionggabas id siriba’ iso’ bondira’, iso’ pomogunon.
“Maha’ daa pamaramaian Tadau Malaysia toun diti kapanahak pomusarahan om ginaras wagu kumaa dati’ toinsanan id kopotilombusan kopoburuan montok papatantu’ timpu dumontol pogun di lobi kalantoi,” ka disio.
