Mohamed Ibrahim Abdul Mutalib ontok guminambar miampai susumikul Univositi Tiknologi Petronas.
KOTA KINABALU: Graduan Univositi Tiknologi Petronas (UTP) unsubon gumuli’ manahak surupukaraja’ id Sabah soira’ kopupus pinsingilaan montok momogonop kopomogunaan ginoris karaja’ kikomilaan.
Ka do Utusan Malaysia, Timbang Canselor UTP, Prof. Datuk Dr. Mohamed Ibrahim Abdul Mutalib minoboros, id timpu diti, Sabah kakal pointoguang kokurian intodonon ginoris tulun i kouhup id kopoburuan pomorunan doid pogun diti.
Ka disio, Sabah masaan tumunda’ sumili hab tumau om gas suai ko’ pipiro pomorunan suai i kikosiwatan nga’ masaan rumalad kumaa Sabah.
Ka disio, tongo’ pomorunan ngaawi’ diti momoguno intodonon ginoris tulun id kaganaan sains, tiknologi, kejuruteraan om matematik (STEM).
Kohondot dilo’, UTP kitonggungan id kopongunsuban tongo’ graduan kolobusan univositi dilo’ do muli’ kawagu id Sabah soira’ kopupus pinsingilaan mooi do kopomogonop kopomogunaan pomorunan.
“Nga’, UTP om tongo’ kotinanan balajaran suai kiguno papamanau tonggungan monguhup momogonop susumikul ngaawi’ Sabah id toilaan om komilaan i gunoon do pomorunan.
“Id pomusarahan ku, amu’ ogumu’ graduan UTP i gumuli’ kumaa Sabah soira’ opupusan pinsingilaan. Mantad dilo’, mongunsub yahai tongo’ graduan mantad Sabah do muli’ manahak surupukaraja’ id pogun diti,” ka disio ontok ramai misuau miampai media Sabah, di songkonihab.
Ka disio, tikid toun amu’ katalib do 50 susumikul mantad Sabah rinamit sumuang kumaa UTP om gisom noondo haro lobi 300 alumni UTP i nokopomupus pininsingilaan.
Mohamed Ibrahim minoboros, UTP toririmo misokodung miampai tongo’ mimparagat pomorunan montok popiromut diolo’ di tongo’ susumikul i komilo onuon kumaraja’ do pomorunan.
“Id nayatan univositi, monguhup tokou poposodia’ impohon montok pomorunan papaharo pokikitanan karaja’ om popowonsoi pituubungan miampai susumikul. Popiromut tokou di susumikul Sabah om pomorunan i momoguno komilaan diolo’.
“Nung piromutan id pialatan pomorunan om susumikul diti osonong nga’, kopongunsub tokou diolo’ gumuli’ patahak surupukaraja’ id Sabah soira’ yolo’ kopupus pinsingilaan,” ka disio.
