Haji Hajiji Haji Noor
KOTA KINABALU: Sabah pasanganu no do soginumu’ 28 tulun Upisor Karaja’ Sosial Pongubatan (PKSP) poingkaraja’ id 24 tinan walai pongubatan (hospital) pototongkop pogun kapaampai hospital pogun, hospital abaal major (agayo) om minor (okoro’), hospital aiso’ abaal nogi’ hospital ‘institusi’.
Boyoon Montiri, Datuk Seri Haji Hajiji Haji Noor minoboros, ginumu’ dilo’ amu’ korungod montok monompuan kobolingkahangan susumakit i momoguno koponguhupan potilombus kumaa monigampot kogunoon sosial di bobos akawas.
Minoboros isio, surupukaraja’ kolidasan montok diolo’ i poingiyon id poonsokid kotoguang pipiro kohimpogongan sasabab no do koyuon ‘geografi’ om kogogonopan padsakaian nogi’ koyuon sosio ikonomi paganakan.
“Haro o 28 no PKSP di haro montok monompuan kes ngaawi’ i posukuon monotk ponguhupan ‘psikososial’ om kousinan montok kopomolian kakamot id koponumboyoan kogunaan pongubatan, tantu’ no do ginumu’ diti amu’ korungod,” ka disio ontok pinopoimagon Pitimungan PKSP Malaysia ko-27 id Ballroom Hotel 7 Suria do hiti di tadau baino’.
Teks boboroson disio binasa’ di Montiri Kousinan, Datuk Seri Masidi Manjun.
Hajiji minoboros, kos pongubatan i nokoingkawas noondo diti miampai mitilombus kapanahak waya’ agayo kumaa kogoosan mogigiyon maganu pongubatan kolidasan.
Ka disio nosusuhut waya’ mantad sunduk ikonomi, noilaan ginumu’ susumakit i maganu pongubatan id hospital koporintaan nokotoguang kinoinsawaton om nokoponubuanan po do kaantaban kumaa puru kolidasan montok poposodia’ surupukaraja’ di kiwaya’ om poinpuli.
Kohondot diti ka disio, surupukaraja’ karaja’ sosial pongubatan kikogunaan kopio montok momogonop kopomogunaan suusmakit di nakapagon om mogisuaian ponit, kopiongoi di angkab ‘reformasi’ kolidasan pomogunon ilo’ nopo nga’ sistom kolidasan di aadang om moningkanan mogigiyon.
“Kohondot dilo’, PKSP kapapanau tonggungan monuridong piromutan pisokodungan miampai kotinanan koporintaan om swasta i koposodia’ intodonon ponguhupan montok monguhup susumakit mosikin om aiso’ kosukupan ontok mamaramit pongubatan om pomolingosan. Yolo’ nga’ koponguhup susumakit (klien) no monigampot kolidasan di lobi kosonong maya’ kapatahakan surupukaraja’ di kisinonong akawas.
“Susumakit id Sabah kiharo kaantaban poinruhang soira’ maganu pongubatan id hospital, institusi om kolinik kolidasan nosusuhut di kobolingkahangan geografi pogun om sinodu’ walai diolo’ id poonsokid. Mantad dilo’, PKSP kiguno momoguno tiknologi kaawagu kopiongoi di kinoburuon maso-maso id kapatahakan surupukaraja’ kumaa susumakit.
“Pontudukan kiguno onuon miagal di maso naantakan tomporuruol Covid-19. Sundung amu’ kaanu sopitimbaba’ miampai susumakit, nga’ surupukaraja’ kiguno tilombuson maya’ tiknologi doun kaawagu miagal ‘konsultasi’ maya’ do piromutan mooid o kolidasan om kotundunan susumakit kotilombus ogompi’, lolobi no susumakit i amu’ kotingan montok ababayan konsultasi posusuhut id kogogonopan pongubatan,” ka disio.
Hajiji lumansan PKSP toririmo poinggirot mongukab intodonon ngaawi’ wagu montok momogonop kogugunoon susumakit miampai poinpuli mantad koinsanai sunduk id koposimbanan kapatahakan surupukaraja’ kolidasan kumaa oinsanan nayatan mogigiyon.
Kalansanan nogi’ disio Pitimungan PKSP Malaysia ko-27 i ki’iuhu “Keharmonian Hidup: Transformasi Masan Depan Bersama” kopomiuwa’ asil i kapanahak koundaran okon nopo ko’ kumaa PKSP, nga nogi’ mogigiyon Sabah do koinsanai.
“Kumaa koinsanai PKSP, tilombuso’ no waya’ om inggisaman kabaalon id kapatahakan surupukaraja’ di bobos osonong kumaa oinsanan susumakit lolobi no susumakit amu’ songkuro kikosukupan,” ka disio.
