Hajiji minonorikohon Mitingan Koduo Kounsol Tenaga Sabah id Menara Kinabalu, Kota Kinabalu, konihab.
KOTA KINABALU: Kounsol Tenaga Sabah (MTS) id mitingan kumoinduo dau pinopolulus pipiro projik kikogunaan agayo montok popoburu’ kopongimbulayan kiginumu’ ginoris 700 Megawatt (MW) kumaa koponondulionan Sistem Grid pogun diti.
Boyoon Montiri, Datuk Seri Haji Hajiji Haji Noor minoboros, wookon projik agayo nopo dilo’ Projik Hidro Elektrik om Loji Janakuasa Gas Sandad montok papatantu’ kojominan pangaba’ lotirik id korungod id pogun diti do timpu noondo om obontol.
Ka disio, mitingan MTS nga’ minokinongou nogi’ komi ponimbar mantad Energy Commision of Sabah (ECoS) karait kinoburuon tongo’ projik kopongimbulayan oponsol suai i pinogonuan laang nosusuhut kootusan di winonsoi id mitingan MTS kumoinsan wulan Koonom notoliban.
“Iti kaampai no kootusan kohondot kopoindalanan tongo’ projik intodonon ginoris timpu dumontol ilo’ nopo nga’ kosiwatan om karalano’ kopoburuan hidro elektrik miampai poinpuli id Sabah maya’ ponorisidian Sabah Hydro Development Masteplan i masaan poindalanon do ECoS, nogi’ karalano’ kopoburuan loji Ocean Thermal Energy Conversion (OTEC) maya’ konsep Projik Ponogulu Ponimpuunan,” ka disio katalib minonorikohon Mitingan Koduo MTS id Menara Kinabalu do hiti, konihab.
Hajiji lumansan oinsanan inggisaman di pinoindalan dilo’ kapanahak koundaran bobos osonong id koponigampotan ginoris di aanu posunduran, aanu sumanganu om po’ompus do timpu diti om obontol.
Ka disio, iti kopiongoi di Palan Induk Ginoris – Sabah Energy Roadmap and Masterplan 2040 (SE-RAMP 2024) montok koburuon Sabah om kapanahak koinsanangan kumaa mogigiyon pogun diti.
MTS tinuridong nosusuhut kinapatahakan kuasa’ kapanamangan kopoindalanan ginoris mantad Koporintaan Pisompuruan kumaa sabah om montok pongolon Puruankuasa’ Pamalanan om Kopoindalanan Kapangabaan Lotirik om Tarif (JPPPET) Sabah.
