Haji Hajiji Haji Noor
TUARAN: Boyoon Montiri, Datuk Seri Haji Hajiji Haji Noor minagangat mogigiyon pogun diti popokili Jalur Gemilang om bondira’ Sabah montok poposindak po do Wulan Kabansaan.
Ka disio, mogigiyon kiguno manganu bohogian id inggisaman “1 Walai 1 Jalur Gemilang”, i kapanahak kosiwatan kumaa toinsanan montok popokito kopongupusan om ka disio, ‘Merdeka’ okon ko’ boros nopo tomod i kisuang turu’ pimato om haro tolu suku boros, Merdeka nopo nga’ asil mantad inggisaman ogirot montok minonobus bantug tinaru, ilo’ nopo nga’ mantad kinopoburuan olidang do mongobi’ tana’ tungkusan.
“Merdeka nopo nga’ limunduk naangayan iso’ kinopoburuan montok monimpuun kopoburuan wagu. Merdeka nowonsoi mantad tukod susuyan kahandaman, montok monuridong sinusuyan di wagu. Merdeka nopo nga’ kotos bobos kigatang pogun tinaru,” ka disio pinoposotol.
Hajiji minoboros, inggisaman momowotik om mongulud timpu dumontol pomogunon poingiliu id inggisaman om kinopinogoton sukod wagu tu’ id lihawa diolo’ no kinoilihon angkab mooi do pomogunon kotilombus misompuru om ogirot kopongunsikohan kumaa pomogunon.
“Miampai popokiro Jalur Gemilang om bondira Sabah id tikid walai, okon nopo ko’ kapangaramai tokou do Tadau Kinomordikaan nga nogi’ monginggirot kagos sabaagi mogigiyon Malaysia,” ka disio id kinopoimaganan Ababayan Kembara Merdeka Jalur Gemilang (KMJG) 2024 Nayatan Watas Tuaran id Lintuhun Mogigiyon Kakadayan Tenghilan doros hiti di tadau baino’. Teks boboroson disio binasa’ di Montiri Koburuon Labus Kakadayan, Datuk Jahid Jahim.
Boyoon Montiri minoboros, toun diti nopo nga’ toun di poinsusuul lolobi no montok mogigiyon Sabah sabab montok kumoinsan nogi’ Tadau Kabansaan om Tadau Sabah ramaion do miandad miampai pohimagon soira’ o Tadau Sabah pinohimagon di ko 5tw Koonom katatalib.
Ka disio, pamaramaian Tadau Kabansaan om Tadau Sabah oponsol montok Sabah tu’ ilo’ nopo nga’ timpu montok mogigiyon Sabah momuginawo komoyon kinoiduan mantad kopogkuasa’an solinaid hinapadan toun.
“Id lihawa do sukod wagu pasaanan tokou tonggungan mooi do pomogunon kotilombus koburu’ om kounsikou. Kumaa diolo’ no potungkusan tokou tonggungan montok popoburu’ pomogunon.
“Tuhan pinopotungu pomogunan diti do kinopuawangon om mogisusuai kosiwatan, kohondot dilo’ sukod wagu apatut monongkisolod kosiwatan di poinwalad diti miampai monuridong ginoris om monsupu’ kalantaion di lobi kagayo mooi pomogunon kosili abantug,” ka disio.
Minoboros isio, Ababayan KMJG okon ko’ ababayan toun-toun nopo, nga’ kokitanan pisompuruan, koondosan om kopongunsikohan dati’ sabaagi mogigiyon Malaysia.
“Koposorou ilo’ dati’ di kinolubukan om ninggisaman tongo’ kobilangan pomogunon montok kinoiduan om kinomogoton i popuriman tokou do noondo diti,” ka disio.
