Jannie Lasimbang
PENAMPANG: Kapamaramaian Tadau Tulun Sandad Sompomogunan (PHOAS) toun diti rinamit do oinsanan mogigiyon Tulun Sandad id Malaysia id Bau, Sarawak minimpuun ko 7 gisom ko9tw Kowalu’.
Di baino’, apat forum karait tongo’ haal ngaawi’ potoguang do mogigiyon Tulun Sandad, kaampai kopotutan tana’ adat, koburuon po’ompus om tonggungan koonduan id kopotutan kopotontuan tinan minaan poonjuro’.
Wookon panelis forum nopo Tun Richard Malanjum, bagas Luguan Hakim Negara om i Jannie Lasimbang, ADUN Kapayan i tuminanud do ababayan dilo’ maya’ piromutan.
Kalansanan di Jannie manganganjur agayo ilo’ nopo nga’ Jaringan Orang Asal SeMalaysia (JOAS) minaganu di tongo’ atag mantad forum dilo’ montok laang potilombus.
“Kikosiwatan oku minanahak kopoilangan karait di tonggungan koonduan id kopotutan kopotontuan tinan, hinombo do minoboros oku karait karalano’ koonduan rumomut kumaa intodonon, kosiwatan om kuasa’ momonsoi kootuson id mogigiyon.
“Montok tondu’ Tulun Sandad, tonggungan id kopotutan kopotontuan tinan kaampai no kohompitan id kapamansaian kootuson om kopomuruanan. Iti aanu monigampot miampai manahak kosiwatan om kotumbayaan kumaa koonduan sumili momuruan. Sistem kuota nga’ kiguno soira’ ‘patriaki’ om kopoindisanan koonduan kakal nosili noubasanan.
“Montok papatantu’, koonduan Tulun Sandad kaanu piromutan kumaa intodonon, paganakan kiguno popotungkus tana’ miampai aadang kumaa tanak tondu’.
“Suai ko ilo’, palan undang-undang mositi’ papatantu’ koonduan Tulun Sandad oonuan kopotutan di miagal id kosongonuan om pongigitan tana’,” ka disio id kointalangan di tadau baino’.
Minoboros isio, pongumoligan nga’ oponsol montok tondu’ Tulun Sandad kaampai kopotutan montok masi miampai aiso’ kopongindaraatan, kopotutan pongumoligan undang-undang, om piromutan kumaa kaadangon.
“Sokodung kousinan om ababayan kumaa mongindapu’ koonduan Tulun Sandad nga’ oponsol kopio mooi do lobi yolo’ kopimpoopori id sunduk ikonomi, naamot sokodung koporintaan id sunduk panamangan tanak-anak kapanahak kosimbayanan tondu’ tulun sandad do tumanud kaparagatan kapagarasan om kogompitan aparagat.
“Maya’ karamaian diti, kalansanan kopogirot ilo’ do pogisokodungan id nayatan mogigiyon i potuu id nayatan paganakan, kampung, pgoun om pomogunan mooi do kopointutun kopomorotian di lobi kosonong karait koponsolon mongumolig om monokodung mogigiyon tulun sandad id pototongkop pomogunan.”
