Juliah (toguang, tanga’) guminambar pongingitanan miampai oinsanan di nokotindapou.
TUARAN: Walai Alap nosili longkod kopoindalanan i kapagaras kaparagatan Koisaan Suri om Puru Koonduan Surupukaraja’ Koporintaan (PUSPANITA) Raan Watas Tuaran.
Ka di Ponorikohon PUSPANITA Raan Watas Tuaran, Beverly Lee, walai dilo’ kopoinsanang kopoindalanan kaparagatan kosuul no i kopohompit do koonduan.
“Ougmu’ palan kaparagatan lolobi no kaparagatan kopohompit koonduan miagal bingkil ‘keterampilan’ om nogi’ bingkil i kapanahak nindopuan montok koonduan.
Suai ko ilo’, mantad haro walai diti, kiharo koiyonon dahai om lobi kasanang montok dahai popoindalan oinsanan kaparagatan di napalan dahai,” ka disio ontok rinubaan media katalib Ramai Kinopoimaganan Walai Alap PUSPANITA Raan Watas Tuaran id Upis Watsa do hiti, di tadau Kaapat.
Kinopohimaganan dilo’ pinoindalan di Sawo Boyoon Montiri, Datin Seri Panglima Datuk Juliah Salag i po nogi’ Mananamong PUSPANITA Pogun Sabah.
Daamot dilo’, i Beverly pinopoilo mantad sunduk kotundunan, PUSPANITA pinapatahak nogi’ ponguhupan kumaa diolo’ i momoguno.
“PUSPANITA nga’ manahak ponguhupan kumaa diolo’ i momoguno miagal do nogompitan kadaaton liyud di kaawagu diti suai ko’ montok tangaanak yatim om paganakan mosikin.
“Suai ko’ manahak toluod, manahak nogi’ yahai ponguhupan id sokodung ‘moral’,” ka disio kawagu.
Nokotindapou nogi’, Ponorikohon PUSPANITA Pogun Sabah, Datin Seri Panglima Dr. Nuinda Alias; Upisor Watas, Hadzlan Jablee i po nogi’ Monontuduk PUSPANITA Raan Watas Tuaran om i Monunurat Pointatap Komontirian Koburuon Labus Kakadayan, Datuk Norlijah Danin.
Walai Alap nopo nga’ pamarait piomungan tinaru Dusun om Bajau i kirati do ‘walai osonong’ nogi’ kikoundaran om nokotimpuun ilo’ nukaban pointonod wulan Koiso’ toun diti.
