Arifin (kaapat, gibang) guminambar pongingitanan miampai mamaramit ponguhupan.
KOTA KINABALU: Sikul Kabansaan (SK) Rampayan om Masjid An-Nur doros Inanam i noumpadanan liyud di kaawagu diti nakaramit ponguhupan miampai ginumu’ koinsanai RM82,000.
Ponguhupan dilo’ pinotunui di Montiri Sains, Tiknologi om Inovasi, Datuk Dr. Mohd. Arifin Mohd. Arif id Ababayan Ziarah Kasih Nogompitan Liyud Kg. Rampayan, Inanam, di tadau Kaapat.
Arifin po nogi’ Exco Ugama’ om Exco Balajaran Sabah minoboros mantad ginumu’ dilo’, SK Rampayan nakaramit RM40,000 mantad ponguhupan Kounsol Ugama’ Islam Sabah (MUIS) soginumu’ RM5,000, Tabung Balajaran Pogun Sabah (RM20,000) om Koporintaan Pogun (RM15,000).
Naamot, Masjid An-Nur nakaramit toluod kiginumu’ RM42,000 i kapaampai RM32,000 mantad Koupisan Hal Ugama’ Islam Pogun Sabah (JHEAINS) ilo’ nopo nga’ babarang akanon, kogogonopan solat om kolidasan, suai ko’ RM10,000 mantad Kotinanan Baitulmal Pogun Sabah (PBNS) kaampai no kakamot masjid.
Suai dilo’, 100 bakut takanon sopipoopori pinotoluod do Univositi Malaysia Sabah om Kelab Kotundunan Raisul kumaa mogigiyon ngaawi dilo’.
