Luguan Upisor Eksekutif STB, Julinus Jeffrey Jimit om Chester Voo miniolon dokumen memorandum pihunungan pisokodungan kohunung STB om AirAsia, om sinasi’ di Christina Liew id Kota Kinabalu di konihab.
KOTA KINABALU: Siktor ponombuluyan Sabah pikikiro kotilombus koinggayo miampai kinoingkawasan piromutan tawan maya’ pisokodungan kohunung Kotinanan Ponombuluyan Sabah (STB) om Komponi Pontuludan AirAsia i nokopikogos konihab.
Tumanud Utusan Malaysia, Montiri Ponombuluyan, Koubasanan om Sandad Posorili’, Datuk Christina Liew minoboros, pisokodungan dilo’ pikikiro koponginggirot ningkakaton Sabah sabaagi rikoton ponombuluyan agayo id Koiyonon Kosunion Asean Kosilahon Brunei Darussalam-Indonesia-Malaysia-Filipina (BIMP-EAGA) nogi’ koiyonon ASEAN.
Pisokodungan kohunung solinaid limo toun (2024-2028) dilo’ kotilombus koposiau siktor ponombuluyan pogun diti. Di kaawagu, Sabah nabantug sabaagi iso’ mantad rikoton i ogoosan om AirAsia pinapapanau tonggungan oponsol id kinoponigampotan diti.
“Po’ompus wulan Koiso’ gisom Ko’onom, Sabah nokoposurat kinosuangan 1.24 riong tutumombului maya’ piromutan pontuludan AirAsia.
“Gisom toun 2022, siktor ponombuluyan nokouhup kumaa 22.8 pihatus pakarajaan id pogun diti kaampai karaja’ id hotel, restoran, agensi ponombuluyan, om longkod ponombuluyan nokoiyonon,” ka disio id iso’ kopointalangan.
Daamot dilo’, Kumoduo Luguan Upisor Eksekutif Tinimungan (Operasi Pontuludan) AirAsia Aviation Group, Datuk Kapten Chester Voo minoboros, pisokodungan di nowonsoi nopo dilo’ nga’ laang oponsol montok tinimungan AirAsia popoinggayo piromutan mantad hab koduo bobos agayo id Malaysia diti.
Pointonod 2022, AirAsia pinopotulud somok 80 riong susumakai mantad om pakaya’an id Sabah maya’ wawaya’an suang pogun nogi’ sompomogunan.
Tinimungan AirAsia noondo diti tumulud kumaa 23 rikoton mantad om kumaa Sabah miampai ginumu’ 294 pontuludan sominggu.
