Tinimungan bomba pinopoindalan karaja’ popoundaliu nohompitan id koiyonon noumpadanan liyud id Putatan.-Gambar Bomba
KOTA KINABALU: Nohompitan liyud i pinoiyon id longkod poundolihan naamot (PPS) id pogun diti nokoingkawas mantad 114 tulun kujminaa 328 tulun gisom di jaam ko 4 sodopon baino’.
Tumanud Utusan Malaysia, Sekretariat Puruankuasa’ Ponguludan Kadaaton Pogun (JPBN) Sabah pinopoilo koinsanai 328 tulun mantad 105 paganakan dilo’ pinoiyon id apat PPS i nukaban doid Penampang, Putatan, Tuaran om Tamparuli gama-gama’ liyud pointonod po di sodopon konihab.
Mantad ginumu’ dilo’, soginumu’ 165 nohompitan liyud mantad 67 paganakan pinoiyon id PPS Lintuhun Koubasanan Penampang om 116 tulun pinoiyonon id Lintuhun Sri Putatan.
Naamot dilo’, 29 tulun pinoiyon id Lintuhun Balai Raya Kampung Tutu Selupoh, Tuaran om 18 tulun pinoiyon id Lintuhun Balai Raya Kampung Bontoi, Tamparuli.
Liyud i naantakan id Penampang nokoporundun po nogi’ niawa songulun tondu’ kiumur 37 toun i norulun ontok minonongkiad mantad padsakaian i notorob waig doros Ralan Penampang Bypass.
Liyud dilo’ nokoowit nogi’ 10 sikul i kiharo 5,077 susumikul id koiyonon di noliyudan id Penampng, Papar, Sipitang om Tuaran, sinompon.
Rasam asapou pointonod pinatanga’ adau di konihab nokoowit nogi’ tana’ nopuhak gisom nokoowit Ralan Tambunan-Penampang noputut. Ralan dilo’ amu’ awaya’an do oinsanan ponit padsakaian.
