Hajiji om i Ewon monongkiboros miampai songulun nohompitan liyud id Longkod Koubasanan Penampang di tadau baino’.
PENAMPANG: Boyoon Montiri, Datuk Seri Haji Hajiji Haji Noor minonuhu’ oinsanan bohogian kikuasa’ nokoiyonon (PBT) id poliliput pogun do toririmo mamong-tamong id timpu gumompus diti.
“Potontuon oinsanan parit oburisian, kada’ indando’ rumasam om maganu nogi’ do laang.
“Mimang tokou mongingkuri’ kaantakan om mositi’ sumosodia’ do tikid timpu,” ka disio katalib kuminakap nohompitan liyud id longkod poiyanan naamot, Longkod Koubasanan Penampang, do hiti, di tadau baino’.
Boyoon Montiri minoboros, Koporintaan Pogun om Pisompuruan opoduli’ kopio kumaa diolo’ i noumpadanan gama-gama’ liyud monigowo om monguhup koinsanai di nogompitan.
Hajiji (tanga’) minooi intong koyuon liyud id Kampung Hungab, Penampang di tadau baino’.
“Koporintaan Pogun osianan di konosipan diolo’ mantad dilo’ poinsodia’ yahai montok manahak ponguhupan tunui ta’arau-arau RM1,000 kumaa tikid pagakanan i hilo’ id Longkod Koubasanan Penampang.
“Koporintaan Pisompuruan maya’ Montiri Koburuon Mongindapu’ om Koperasi, Datuk Ewon Benedick, i po nogi’ Puru Parlimen Penampang, nga’ minonguhup nogi’,” ka disio.
Id timpu di miagal, Koporintaan Pogun nga’ monimbang montok monguhup diolo’ i amu’ nokoundaliu kumaa longkod pongumoligan naamot nga’ walai diolo’ naraag do liyud.
Hajiji pinapatahak ponguhupan kuminaa nogompitan liyud id Longkod Koubasanan Penampang di tadau baino’.
Nokopogulu, Upisor Watas Penampang, Francis Chong minanahak kopointalangan kumaa di Boyoon Montiri do id timpu diti haro 67 pagakanan nokopohompit 165 tulun poumolig id longkod poiyanan naamot dilo’ pointonod nukaban di jaam ko 5.25 sodopon konihab.
Nonuan nogi’ isio kopointalangan do 11 kampung id pososorili’ watas Penampang notorob do waig gama-gama’ rasam asapou di konihab.
Iso’ tulun nokorundun nokopohompit songulun tondu’ i norulun id doros tunturugon doid Donggongon di ontok liyud monigowo.
Talib dilo’, i Hajiji tinanud di Ewon, Monunurat Koporintaan Pogun, Datuk Seri Safar Untong; Monguhup Montiri Karaja’ Agayo, Datuk Limus Juri om Monunurat Haal Suang Pogun om Ponolidikan, Datuk Awang Shaminan Sahari minooi intong koyuon liyud id Kampung Tuavon om Hungab.
