Ewon (wanan) di maso id Longkod Koubasanan Penampang.
PENAMPANG: Puru Parlimen Penampang, Datuk Ewon Benedick pinapatahak ponguhupan RM30,000 montok kopomolian pomoruhang 300 bakul takanon kumaa mogigiyon kampung i noumpadanan liyud id koiyonon Penampang.
Montiri Koburuon Mongindapu’ om Koperasi dilo’ minoboros, ilo’ nopo nga’ pomoruhang di 200 bakul takanon i pinosodia’ do Puruankuasa’ Kadaaton Watas Penampang.
Pinokianu ku Longkod Surupukaraja’ ku do pinoposodia’ pomoruhang 300 bakul takanon kopohompit toluod soginumu’ RM30,000 montok pootodon kumaa walai i momoguno ponguhupan om kapaatadan poindalanon do puruankuasa’ kadaaton,” ka disio.
Minoboros isiod ilo’ id kointalangan media katalib kotombuluyan doid Longkod Poundolihan Naamot (PPS) id Longkod Koubasanan Sabah, Penampang, do hiti, di tadau baino’.
Nohompitan liyud i pinoiyon id PPS Penampang nokoinggumu’ mantad 129 tulun kuminaa 165 tulun di pitanga’ adau.
Di konihab, id kinotombuluyan di Ewon doid PPS Penampang, pinapatahak isio ponguhupan minsindikot RM20,000 kuminaa Puruankuasa’ Kadaaton Watas montok kogunoon kopohompit karaja’ manampasi om kogugunoon suai id longkod poundolihan kadaaton dilo’.
Ewon nga’ pinapatahak nogi’ ponguhupan RM20,000 kumaa SM St. Michael Penampang montok pongundar om kopomurisian koiyonon sikul i noliudan.
“Katalib kuminakap di nogompitan liyud id PPS diti, pinoposiwat oku timpu tuminombului sikul laid ku, SM St. Michael om ruminuba’ di molohingon sikul om tongo’ mongingia’. Pinopotoluod oku RM20,000 montok pomurisian, kopongundaran koiyonon sikul dilo’,” ka disio.
Talib dilo’ i Ewon kuminakap doid pipiro walai mogigiyon kampung i amu’ nokosiwat minundaliu di konihab om minintong sondiri koyuon kinaraagon gama-gama’ liyud lolobi no babarang suang walai.
“Yolo’ pinopoilo iti nopo nga’ kadaaton liyud di bobos araat katalib kinaantakan liyud toun 1999,” ka disio i suminakai padsakaian Kelab 4×4 WRS minooi intong pipiro ralan id Penampang i kakal nolitupan waig.
Minonongkounsikou nogi’ isio kumaa di Boyoon Montiri, Datuk Seri Haji Hajiji Haji Noor i suminiwat kuminakap PPS om pipiro kampung suai, potilombus dino pinapatahak toluod RM1,000 kumaa tikid suang walai (KIR) i pinoundaliu doid PPS.
“Boyoon Montiri nga’ nakaakun nogi’ papatahak kopoobian mangaba’ kogogonopan ropuhan gas kumaa paganakan i amu’ nokosiwat minundaliu. Iti uludon do Puruankuasa’ Kadaaton Watas Penampang,” ka disio.
Kohondot di pangaba’ lotirik id Poliklinik Penampang, ka di Ewon, SESB nopokianu papaatod genset kumaa Poliklinik dilo’ montok mononduli’ kawagu pangaba’ lotirik do hilo’.
“Id pinogintongan sangadau ku id watas Penampang, nokito ku do kakal ogumu’ walai i nopututan pangaba’ waig om lotirik. Stisin poom waig Kasigui amu’ po kaanu mangaba’ waig do noondo diti. Ingkaa nogi’ pipiro pencawang lotirik SESB i amu’ po notonduli’.
“Upis Watas om tongo’ koupisan teknikal poinhompit mogintong do kinaraagon kogogonopan ngaawi’ dilo’ gama-gama’ liyud,” ka disio.
Ewon minonongkounsikou sokodung oinsanan bohogian kaampai no momumuruan koporintaan pogun, tongo’ kotinanan om koupisan koporintaan nogi’ tongo’ tinan okon koporintaan (NGO) mantad sunduan karaja’ iso’ tinimungan minonguhup di nogompitan liyud id koiyonon Penampang.
Kapt:
