Dr. Joachim (koonom, gibang) guminambar miampai koinsanai i nokotindapou id Mitingan Agayo Toun-toun (AGM) PBS Bohogian N7 Tandek, id Lintuhun Poingukab Tandek.
KOTA MARUDU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam mokianu oinsanan lansanon om puru parti id bohogian Tandek miiso’ ginawo montok momohowud watas Lintuhun Undangan Pogun (DUN) Tandek id Pomilian Agayo Pogun (PRN) toun tiso’.
“Nung oiso’ ginawo, Tandek tantu’ kotimporon pasanganu PBS/GRS,” ka disio ontok pinopoimagon Mitingan Agayo Toun-toun (AGM) PBS Bohogian N7 Tandek i pinoindalan id Lintuhun Poingukab Tandek, do hiti di konihab.
Dr. Joachim (tanga’) guminambar ponginigtanan miampai koinsanai nokotindapou id Mitingan Agayo Toun-toun (AGM) PBS Bohogian N6 Bandau, id Lintuhun Walai Bunsadan.
Dr. Joahcim po nogi’ Kumoduo Boyoon Montiri II pinoposorou po nogi’ do oinsanan lansanon om puru PBS kiguno papalantoi GRS (Gabungan Rakyat Sabah) id PRN toun tiso’.
Suai dilo’ ka disio, nuru’ yolo’ tumilombus monokodung angkabon parti i kiumur no do 39 toun dilo’ tu’ poburuon do PBS amu’ po nopongo.
“Poburuon PBS nopo nga’ poburuon montok timpu dumontol Sabah, PBS nopo nga’ kokitanan pogi’isaan,” ka disio kawagu.
Talib dilo’, di doun sosodopon, Dr. Joachim pinopoimagon po nogi’ PBS Bohogian N6 Bandau id Lintuhun Walai Bunsadan.
Nokotindapou nogi’ Monunurat Agayo PBS, Datuk Julita Majungki; Monobubut, Datuk Lu Kim Yun; Luguan Bohogian PBS N7 Tandek, Datuk Hendrus Anding; Kumoduo Luguan Bohogian PBS N6 Bandau, Julita Dalinsi; tongo’ Puru Kounsol Akawas, tongo’ Luguan Bohogian nogi’ Exco Tinimungan Koonduan om Komulakan.
