Dr. Joachim (tanga’) guminambar pongingitanan id mitingan Kotombuluyan Kembara PBT.
BELURAN: Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam mokianu Kounsol Watas Beluran mogihum kosiwatan ngaawi’ di wagu i kopongingkawas nindopuan dau.
Poingkuro po, minoboros isio, iti kiguno powonsoiyon miampai amu’ kopongumpadan toi manahak waya’ araat kumaa mongingigit tonggungan (stakeholders).
Natag po nogi’ disio i Upisor Eksekutif om Ponorikohon Kounsol Watas misokodung id projik toi tongo’ ababayan tingkananon kiwaya’ akawas kumaa tongo’ mongingigit tonggungan id Kounsol Watas Beluran.
Dr. Joachim (poindikau koonom, gibang) guminambar pongingitanan miampai koinsanai i nokotindapou id mitingan Kotombuluyan Kembara PBT montok Kounsol Watas Beluran.
Dr. Joachim minoboros dilo’ ontok kinotombuluyan Kembara Bohogian Kikuasa’ Nokoiyonon (PBT) kuminaa Beluran di tadau Ko’onom (22tw Koonom).
Tinanud isio di Monunurat Pulitik dau, Datuk Jonnybone Kurum; om i Monunurat Pointatap Komontirian, Datuk Dr. Jamili Nais.
Dr. Joachim nonuan kointalangan di Upisor Eksekutif Kounsol Watas Beluran, Huil Binua id Pisuk Mitingan Kounsol dilo’.
Nokotindapou nogi’ id mitingan i Monguhup Montiri Koburuon Labus Kakadayan Sabah po nogi’ Puru Lintuhun Koundangan Pogun (ADUN) Labuk, Datuk Samad Jambri; Monguhup Montiri Pomutanaman, Ponginsadaan om Pomorunan Akanon po nogi ADUN Tandek, Datuk Hendurs Anding; ADUN Sinili, Datuk Jaffari Walliam; Upisor Watas Beluran, Roger Appolonius om nogi’ tongo’ Puru Kounsol Watas Beluran.
Katalib dilo’, Dr. Joachim tuminindapou nogi’ doid Ramai Sopisuau Mogigiyon Beluran i tinompuan di Samad.
