KOTA KINABALU: Parti Bersatu Sabah (PBS) minokianu mogigiyon Sabah tumilombus misompuru id inggisaman monugat 40 pihatus mantad asil oborisi’ naanu Koporintaan Pisompuruan mantad pogun diti.
Kumoduo Presiden dilo’, Datuk Seri Dr. Joachim Gunsalam minoboros, sabaagi moninimpuun id kopoburuan kopotutan Sabah, PBS amu’ insan koguyu’ id inggisaman monugat nunu i nosili kopotutan asanganu pogun.
Minoboros isio, kiguno okunan do, id nunu nopo koyuon, PBS nakalantoi apat Pomilian Agayo Pogun (PRN) otuntud di 1985, 1986, 1990 om 1994 tu’ mantad no do tinonggungan dau popoburu’ koponsolon Sabah miagal poinsuang id Ruputan Pibatosan Malaysia 1963 (MA63) om Intergovernmental Committe (IGC).
“PBS tumilombus ogirot popoburu’ kopotutan poguni alaid no do nosili ninggisaman agayo PBS pointonod pinonuridongan dilo’ di1985,” ka di Dr. Joachim, i po nogi’ Kumoduo Boyoon Montiri Sabah.
“Kapanahakan 40 pihatus dilo’ okon i ko’ angkab nopo miagal di komoyon di luyar Tengku Datuk Fuad Ahmad. Poingkodou yahai di ningkakaton dahai om popoburu’ kopotutan Sabah om mogigiyon Sabah, hinombo no kogisomon di gunoon,” ka disio id kointalangan di tadau baino’.
Sabaagi komponen agayo Gabungan Rakyat Sabah (GRS), PBS poungkakat ogirot miampai di Boyoon Montiri, Datuk Seri Haji Hajiji Haji Noor id pirundingan potitilombus miampai Putrajaya montok maganu kawagu 40 pihatus i noutang kumaa Sabah.
Minoboros isio, PBS maya’ Presiden dilo’, Datuk Seri Dr. Maximus Ongkili, i po nogi’ bagas Montiri id Koupisan Luguan Montiri (Haal Ngaawi’ Sabah om Sarawak) nokopointanga’ haal diti miampai di Luguan Montiri ontok dilo’ maya’ Kounsol Pinotomod MA63.
Dr. Joachim minoboros dilo’ montok mongomi di Fuad i nokorikot sigog ii’ doid Kuut Takawas Kota Kinabalu di tadau Kaapat hinombo disio pinopotoguang upalai montok kasampalagan (intervensi), i sumuku’ kumaa karalano’ boogian labus i okon ko’ boogian sandad, umampai kes.
Upis Luyar Agayo amu’ pinopotoguang nunu-nunu kagagaan kohondot upalai intervensi dilo’, nga’ luyar Koisaan Undang-undang Sabah, Dr. David Fung, Jeyan T.M. Marimuttu om Janice Junie Lim, guminaga’.
SLS minoboros do Koporintaan Pogun Sabah aiso’ kopotutan montok kinongohon sabab kopokinsianan dilo’ kapaampai nopo do upalai kapasagaan.
Fuad minoboros do intervensi dilo’ kiguno montok mongilag kaantakan kopotutan Koporintaan Pogun Sabah montok sumahap kopoopian panahakan pinotomod 40 pihatus opisok do amu’ opokinongou.
Ka disio kawagu, aiso’ kogunaan montok SLS momonsoi koponimakan kohokiman sabab Koporintaan Pogun Sabah masaan miuhup miampai Koporintaan Pisompuruan montok mogintong kawagu hal karait kapanahakan pinotomod Sabah.
Kuut Pokinsianan pinopourut kootusan dau karait kopokinsianan Koporintaan Pisompuruan kohondot kapasagaan di pinatahak kumaa SLS.
