Hajiji sinuau do mogigion Mukim Tambalang.
TUARAN: Boyoon Montiri, Datuk Seri Haji Hajiji Haji Noor otumbayaan Sabah kaanu sumili wookon pogun id kawas pomogunon id suang timpu limo toun mantad baino’.
“I nopo oponsol nga’ palan montok monguhup om mongingkawas rontob sosio ikonomi mogigiyon,” ka disio id ababayan mongukab puasa miampai mogigiyon Mukim Tambalang doid Masjid As-Sajdin do hiti, di tadau baino’.
Hajiji po nogi’ ADUN Sulaman, nga’ mimang nogi’ do Tuaran kosili turianan bobos osonong pisompuruan om id sunduk monokodung poinponu’ Koporintaan Pogun noondo.
“Mimang oku Tuaran kosili ombitanan bobos osonong id kapanahakan sokodung ogirot kumaa Koporintaan Pogun diti babaino[‘,” ka disio.
Hajiji pinapatahak toluod kumaa mongongobi’ 728 mamaramit Mukim Tambalang.
Boyoon Montiri minomohulit nogi’ kopongunsuban mooi do mogigiyon amu’ aampawong di habar oudut om totondos pembangkang i moniisinda’ Koporintaan Pogun.
Ontok wulan Ramadan, ka di Hajiji, timpu dau opidot nga’ poposiwat timpu montok rumuba’ mogigiyon om tumonggoi mongukab puasa.
“Suab (tadau Koiso’) mooi oku id Pulau Pinang montok mongukab puasa miampai di 1,400 susumikul tajaan Yayasan Sabah,” ka disio.
Nunsub nogi’ di Hajiji o tulun ginumuan maganu kosiwatan montok popogirot piromutan om silaturahim po’ompus wulan Ramadan di obitua diti.
“Kada’ tokou lihuai yolo’ i amu’ songkuro kinonosipan,” ka disio.
Id ababayan dilo’, i Hajiji pinapatahak toluod kuminaa di 728 mamaramit mantad 21 kampung id Mukim Tambalang.
Nokotindapou nogi‘ i Puru Parlimen Labuan, Datuk Suhaili Abd. Rahman om Luguan Monunurat Pulitik kumaa Boyoon Montiri, Datuk Abdul Kassim Razali.
