Fairuz Renddan
KOTA KINABALU: Koporintaan Pogun mogintong kopio kes songulun susumikul kusai nokito napatai id pisuk asrama doid songinan kolej vokasional id Lahad Datu, di tadau Kolimo.
Monguhup Montiri Komulakan om Sipoot Pogun, Datuk Fairuz Renddan minoboros, hal dilo’ awagat kopio om Koporintaan Pogun mogintong poinwagat kes kinaraaton kapaampai susumikul sikul.
“Kinaantakan diti naantakan id asrama kolej om pinoruput nokopohompit ogumu’ mongingiyon asrama. Pokionuon tokou bohogian pulis om Komontirian Pinsingilaan Kolej popoindalan ponoriukan poinpuli om osorisid mooi do laang poinpatut aanu kumaa diolo’ di nokohompit.
“Hal miagal diti aanu mongilag nung susumikul om mongingiyon id asrama kiharo disiplin om sunduan pogititimbangan di akawas.
“Nunu-nunu pisansalaan pirotian di aantakan id nayatan mongingiyon asrama mositi’ no do osikap poruputon kumaa warden asrama. Oponsol iti mooi do kaantakan di amu’ kasagaan miagal di naantakan id Lahad Datu amu’ ohulit do timpu dumontol,” ka disio id kointalangan di tadau baino’.
Minongomi isio kinaantakan songulun susumikul kusai i nokito napatai id pisuk asrama, komoyon do numangan di tongo’ tambalut id iso’ kinaantakan doid songinan kolej vokasional id Lahad Datu, di tadau Kolimo.
I nogompitan, Mohammad Nazmie Aizzat Muhd Narul Azwan, 17, nokito amu’ kopuriman di warden asrama di jam ko 6.50 kosuabon ontok tadau dilo’.
Luguan Pulis Watas Lahad Datu, Asisten Komisioner Dr. Rohan Shah Ahmad minoboros, bohogian disio nakaramit ruputan mantad Potunud kolej dilo’.
“Minaganu laang mantad ruputan di naramit, tinimungan pulis mantad Bohogian Ponoriukan Kopomusalaan Watas (BSJD) Longkod Upis Pulis Watas (IPD) Lahad Datu pinaatod kuminaa kinoiyonon kinaantakan.
“Ponoriukan tosopung nokopokito kinaantakan dilo’ naantakan id asrama kusai kolej om asil pinomorisaan nokoilo do haro tinan songulun komulakan kusai poingiliu id sirang suang songinan pisuk asrama kolej,” ka disio id kointalangan.
Pinointalang disio do pinomorisaan potilombus nokoilo haro tanda-tanda kinosinduolan om nokolonit id pipiro bohogian tinan di nogompitan.
Ka di Fairuz, bohogian sikul om Koupisan Balajaran nga’ kiguno nogi’ manahak kopomodulianan di kes ‘buli’ do poinginan i nokoruput naantakan id sikul ngaawi’ mananga’ pogun diti.
“Bohogian sikul om Koupisan Balajaran nga’ pokionuon papatantu’ laang disiplin aanu kohondot susumikul di kisala’ om amu’ monongkiupakat di sala’ pogogouon buli om kopongumangan i kapaampai susumikul sikul,” ka disio pinoposotol.
