Koiyonon montok manahak takanon kumaa sada’ i okito do otuu kopio id Tagal Kg. Poturidong, Tuaran di ko 27tw Koduo 2024.- Koupisan Pomutanaman Sabah
KOTA KINABALU: Timpu magadau di alaid, nosubuanan po di fenomena El-Nino i pikikiro, koponinong kaantaban agayo kumaa kopolobusan kojominan takanon id Sabah.
Kumoduo Boyoon Montiri I, Datuk Seri Dr. Jeffrey Kitingan minoboros, kinokurion rasam om kinoinsawaton linasu’ nokopogowit rontob waig baang nokoingkuri’ pialatan 10 pihatus gisom 40 pihatus mantad rontob toririmo, i nokopongumpadan do kaparagatan pomutanaman, pomutayaman, akuakultur, om kopolobusan gata’.
“Minokianu oku ruputan mantad mogisusuai koupisan om kotinanan id siriba’ Komontirian ku montok mogintong koyuon om laang di masaan poindalanon montok mongingkuri’ waya’ araat fenomena diti,” ka di Montiri Pomutanaman, Ponginsadaan om Pomorunan Akanon dilo’ id iso’ kointalangan di tadau baino’.
Dr. Jeffrey minoboros, kopogintangan di poinpuli i notimung mantad mogisusuai koupisan om kotinanan id siriba’ Komontirian disio nokopokito do koyuon tongus do otuu nakapanahak waya’ atalang kumaa siktor pomutanaman id mogisusuai karalano’.
Iti kaampai kinoinsiribaon rontob waig montok pomuwaig, magantob kosunion tanom gama-gama’ kinoinsiribaon rasam om kaantakan koinsiribaon asil nimbulayan tayam gama-gama’ okurian takanon, ka disio.
“Koyuon diti awagat om momoguno pomodulianan osikap om po’ompus. Komontirian masaan aparagat popoindalan tongo’ laang ngaawi’ montok mongingkuri’ waya’ araat om papatantu’ ginoris kinatahanon sistem kopolobusan koumoligan takanon tokou,” ka disio.
Dr. Jeffrey minoboros, kinokitanan do Koupisan Pomuwoigan om Poluyungan (JPS) Sabah nokopokito kogumuan baang id Sabah nokotoguang kinoinsiribaon rontob waig gisom nokopongumpadan pangaba’ waig pomuwaig di atalang.
“Koiyonon nadalaan kaampai Kota Belud, Keningau, Membakut, Tambunan om Kota Marudu.
“Kinoingkurion atalang id rontob waig di pinoruput id pipiro skim pomuwoigan, miampai laang ngaawi’ miagal do kopoikidan okikit (catuan) waig pinoindalan montok kopomogunaan intodonon di kisapad. Ginumu’ di pinotomod kaampai Skim Timbang Batu Kota Marudu, miampai kinoinsiribaon rontob waig baang di po’ompus, naamot Skim Pomuwoigan Membakut, hinombo do rontob waig baang nokoinsiriba’ soginumu’ duo meter mantad rontob noubasanan, kopomolohingkahang inggisaman pomuwoigan om rontob Baang Padas, Beaufort do noondo id rontob 2.58m, osodu’ kinoinsiribaon ko’ mantad di rontob kasasai’ 4.58.”
Minoboros isio kinopogintangan Koupisan Pomutanaman Sabah nokopokito fenomena El-Nino nokoowit kinoingkurion rasam (kikiro 80mm di wulan Koiso’ om Koduo 2024), nokopongumpadan agronomi tanom om pomogunaan tana’. Lolobi no, kosunion ‘vegetatif’, kopongusakan om kopotontuan tuwa’ aantaban, i koowit do koingkurion asil id timpu di anaru.
Kinoingkawason linasu’ nokoponginsikap nogi’ kotuuhon waig tana’, nokoowit do tana’ otuu, sinagub tana’ nokoingkuri’ om kosunion gamut aantaban, i nokoponginraag do koonuan nutrien om waig, ka disio, i minoboros id koiyonon miagal do K1 montok pananaman parai, kosunion tanom nabantut gama-gama’ kinokurion waig, nokoponginraat di kinosodiaon takanon montok tayam.
Dr. Jeffrey minoboros, Koupisan Ponginsadaan Sabah pinopoilo do sundung id koyuon di otuu, kogumuan karaja’ kopomogompian sada’ kakal amu’ nokoporuput waya’ di atalang, asil mantad ponontudukan osopung om kinopongingkurian waig ginumu’ sitok. Poingkuro po ka disio, koyuon otuu do po’ompus koowit kokurion waig id stisin akuakultur om kopongumpadan koinggumuon sada’ waig aanau.
“Aiso’ o kinapataion sada’ toi kinorugion agayo di pinoruput id puruankuasa’ ‘tagal’ giosm noondo. Poingkuro po, nung kotilombus koyuon tawan otuu, koyuon diti kosili lobi araat, koowit kapataion sada’,” ka disio.
Minoboros isio, Koperasi Pembangunan Desa (KPD) pinoporuput kaantaban id kopolobusan tanom om tayam, miampai kinoingkawason rontob kinapataion id kopogowitan tanak manuk amu’ katalib 5 pihatus om kogunaan montok ingigsaman pomuwoigan pomoruhang montok monilombus kolidason tanom.
Kinokitanan Kotinanan Pomorunan Gata’ Sabah (LIGS) nokopokito nosusuhut koyuon otuu, pananaman gata’ wagu notingkadan, kapamajaan di nokoinrulan om kinoingkurion kopomutungan id koiyonon kabun di otuu kopio montok mongingkuri’ koriohan guas.
“Montok tanom nanas MD3 id Projik Inisiatif Pendapatan Rakyat id Kampung Gana, Kota Marudu, soginumu’ 1.7 riong tinan nanas di tinanom. Koiyonon diti nakaramit okuri’ rasam om amu’ nadalaan kopio di koyuon otuu, nakapasaga’ pananaman nanas tinilombus om aiso’ kohimpogong di agayo,” ka disio pinopointalang.
Dr. Jeffrey minoboros, mogisusuai laang aparagat masaan onuon padarapas koinsanai koupisan om kotinanan montok monoibau kaantaban di nokoimbulai do koyuon otuu kaampai Ponguludan Pomuwoigan i nakapaampai kopoindalanan catuan waig om pomogunaan poom manau-panau montok papatantu’ pangaba’ waig pomuwaig om Pomogunaan Pomutanaman miampai manahak ponontudukan karait kokurion rontob sitok, kopotingkadan naamot ababayan pomutanaman atantu’ om pomorunaan ponit tanom di asangal do tadau nung kaanu.
Nogi’, Koposudongan Akuakultur i mongunsub tongo’ mongungusaha’ akuakultur mongingkuri’ kinopidoton sitok om moningkod kopoindalanan, nung nuru’, montok mongingkuri’ korugion, Koponguludan Tayam i papaatad karalano’ montok mongingkuri’ linasu’ om kokurion takanon montok tayam, Koponguludan Pomorunan Gata’ i kapaampai kopotingkodan naamot ababayan om koposotolan atantu’, kokomoi koponguludan kabun di haro montok papatantu’ kolidasan sumusuni.
