Ababayan momutul kek di Dr. Maximus, Dr. Joachim miampai tongo’ Kumoduo Presiden, tongo’ Timbang Presiden, oinsanan Puru Kounsol Akawas om Monontuduk Agayo, Tan Sri Pairin kopihondot Ramai Kinopomoromitan Kouliton Toun PBS di ko-39.
KOTA KINABALU: Parti Bersatu Sabah (PBS) kakal nosili sabaagi somboogian mantad ponokotoruntud kosimbanon osonong id mogigion Sabah soira’ somok apat nohopod toun sundung asaru’ opinsingumbalan miampai kaantaban, ka di Presiden dilo’ Datuk Seri Dr. Maximus Ongkili.
“Poburuon PBS solinaid somok apat dekad agayo kopio. Koinsanai diti nopo mantad no tinonggungan, tinoboi om sunduan kopoburuan i pinokitanan di tongo’ lansanon om puru solinaid diti.
“Oinsanan, nokosigampot tokou ogumu’ kinalantaion om nokopoibau mogisusuai kaantaban, om kalansanan kopogi’isaan diti kotilombus oinggirotan, om sunduan kopoburuan montok koundaran mogigiyon Sabah toririmo posingkalab.
“Pogumbalan om pogumbalan, id pamanahon dilo’, pipiro lansanon om puru tokou nokoinsud mantad waya’an kopoburuan PBS. Nga’, oondos oku kopio tu’ mantad no dokoyu ngaawi’ sundung potoguang do pogumbalan, toririmo tokou do mogiampai sopiirak om sopiihad.
“Still, we must always be ready for any eventualities and we cannot take things for granted. Naangayan i nosigampot tokou noondo diti amu’ kotimporon nung amu’ tokou minggisom momusus dilo’. Kada’ yati’ koondos om kopuriman do orungod di naangayan parti tokou do noondo diti sabab osodu’ no kinoinsudo’ tokou nung piadangon di naangayan tokou di pogulu.
“Kigun ingkawasan po o ninggisaman, kumaraja’ agaras, tonggungan akawas om mogisokodung id parti montok popogirot om papagaras PBS mooi do kaanu tokou poguli’ kobontugan tokou,” ka disio id kinapangaramaian koulitan toun ko-39 PBS i pinaanjur id Hakka Hall, do hiti, di tadau Koduo. Boboroson disio binasa’ di Kumoduo Presiden dilo’, Datuk Seri. Dr. Joachim Gunsalam.
Monunurat Agayo po nogi’ Ponorikohon Manganganjur Ramai Kapamaramaian Kouliton Toun PBS ko-39, Datuk Julita Majungki (koduo, gibang) pinapatahak tandamato kuminaa di Dr. Maximus om poingintong i Monontuduk Agayo Tan Sri Joseph Pairin (kotolu, wanan), Dr. Joachim (koduo, wanan) nogi’ ilo suai.
Tinggisaman PBS
Dr. Maximus nga’ otumbayaan nogi’ naangayan parti do noondo pasanganu turu’ timpohon Lintuhun Undangan Pogun (DUN) om iso’ tindikohon Parlimen aanu monginsonong nung kumaraja’ yolo’ do agaras mimpuun babaino’.
“Mindahu’, mooi ruba’ mogigiyon, mokinongou kobolingkahangan diolo’, om popoburu’ kopotutan pogun om mogigiyon Sabah. Kumaa tongo’ YB tokou, otumbayaan oku do oinsanan koilo do ‘title’ YB suai ko’ kirati “YANG BERHORMAT” i lobi lansanon do mogigiyon nopo nga’ kitonggungan kou sabaagi “YANG BERKHIDMAT”, om kumaa diolo’ i mongiman do pongundadait YB diti, kada’ no kadala’ai koondos di nindikohon dilo’ sabab ilo’ nopo nga’ tonggungan di awagat kopio, okon ko’ tiket montok mokimororohoyon,” ka disio.
Kipomusarahan isio kaantaban bobos agayo PBS nopo nga’ montok papatantu’ parti kotilombus do kosudong.
“Our biggest challenge nopo montok papatantu’ PBS kotilombus kosudong. Ogumu’ tongo’ parti wagu di nokoimbulai miagal kulat soira’ otodu’ rasam, nunu podi soira’ orikot timpu pomilian agayo. Mimbulai yolo’ montok mumbal nasip, om haro wookon i tinuridong montok mangasou undi. Tongo’ parti langau miagal diti amu’ apatut onuan kosiwatan montok mongumbal-umbal sokodung mogigiyon.
“PBS okon ko’ parti langau. PBS nokoungkakat id Sabah solinaid 39 toun. Nakawaya’ tokou do rugi pulitik solinaid apat dekad. We are a mature political party, om miampai nawawaya’an dilo’, mimpau di kopomuruanan om puru di ongotoboi, angasangal, kiangkab om kitonggungan, kiguno tokou do kaanu poposurat timpu dumontol Parti Bersatu Sabah.
“Our way forward is montok papagaras po do parti ‘keramat’ tokou diti om nogi’ tinimungan momumuruan omulok PBS i monowoli kopomuruanan takawas.”
Minoboros isio, kinosimbanon sinakagon, kinoinwoguan om kinoburuon sistem demokrasi nakapanahak kosiwatan kumaa sukod wagu montok sumili momumuruan.
“Pomusarahan i mongomi do iri no kabaahan di lobi kotuo om kiumur-umur i lobi kosudong sumili luguan sabab lobi kinawawaya’an, kitonggungan om lobi kopogulu minangakan tusi’ nopo nga’ pomusarahan i kiguno intangan kawagu om piadason tumanud kopomogunaan om kinosimbanon timpu.
“Iti sabab, lakun pulitik talib timpu ‘reformasi’ i minongukab kosiwatan kotumbayaan kumaa sukod wagu i kikosudongan montok sumili calon om mobi’ rayat, nokopokito do tinimungan lansanon omulok pasanganu ginaras diolo’ di poinpoopori. Kumoduo po, lobi diolo’ do karati pokionuon di mongungundi’ i sangampon diolo’.
“Nga’ orohian oku poposorou kumaa toinsanan kosuul no momuruan tomulok do tonggungan sabaagi mobi’ rayat ‘goes beyond the title’. Ilo’ okon ko’ tikid manamong koundaran sondiri toi montok papabantug tinan sondiri’. Soira’ dokoyu pilion do mongungundi’, sabaagi YB, ilo’ nopo nga’ iso’ kotumbayaan mogigiyon do kaanu kou manamong kotundunan diolo’, kaanu mongobi’ rolou om angkab diolo’ doid Dewan Rakyat om Dewan Undangan Pogun.
“Kiguno sorohon do sabaagi YB, iya’ nopo nga’ mobi’ do parti. Pogogoyuon nu torirmo adangon do mogigiyon om kapangadangan mogigiyon kapatantu’ nung kopoburuan PBS kotilombus kosudong om kaanu kotumbayaan om sokodung mogigiyon,” ka disio pinoposotol.
Minoboros isio, sabaagi mobi’ rayat nga’, surupukaraja’ diolo’ nopo montok toinsanan, i potuu mononokodung parti momorinta’ toi parti susumaap.
Kotulidan id kopongigitan karaja’ kiguno silihon posunduran surupukaraja’, ka disio, i minoboros do mogigiyon lumansan lalansanon om koporintaan di otootopot kiginawo mogigiyon, okon ko’ id boros nopo, nga’ pogogoyuon om popoindalan karaja’ nogi’ tonggungan sabaagi momuruan.
“Mantad dilo’, soira’ opili’ sabaagi YB, minggisom no montok toririmo manahak surupukaraja’ di otulid, pointatap om bobos osonong po’ompus timpu,” ka disio.
Kinoburuon pulitik Sabah aparagat kopio
Dr. Maximus minoboros, talib pomilian agayo nokopokito kinoburuon pulitik Sabah di aparagat kopio.
Wookon dilo’, drama i nowit do lansanon UMNO, kootusan pipiro lansanon montok minongiduan ‘bahtera’ Warisan, om nogi’ pinonuridongan parti nokoiyonon Parti Gagasan Rakyat Sabah, kopiongoi di kopokionuan mogigiyon Sabah montok poposili Gabungan Rakyat Sabah (GRS) sabaagi iso’ piomungan toinsanan parti nokoiyonon.
“My teke on all these is that nunu nopo i naantakan, it is at the advantage of GRS. GRS nokoinggirot om otumbayaan oku, iti nopo nga’ piomungan di bobos osonong montok momorinta’ pogun Sabah i koupusan tokou diti. Otumbayaan oku om monungkayan Koporintaan GRS nopo pili’ bobos osonong montok momuruan mogigiyon om papabantug po do kopoburuan pulitik tokou.
“Kinopolulusan Akta Anti Lompat Parti id pitimungan DUN nakatalib nga’ nakatalob nogi’ angkab puru pulitik montok ‘suminimbul’ kuminaa parti i mamatos gula-gula di lobi koomis. Nga’, i bonong pikikiro doti’ do kosili lobi ‘kreatif’ montok mundaliu kumaa parti suai, sabab nubasanan sumimbul parti diti kaagal-agal do kopisawit kopio do pogun Sabah. Wookon oinsanan pogun, yati’ pikikiro doti’ do pasanganu ginumu’ ‘bonong’ di bobos ogumu’. Ogumu’ i orohian mamatai ‘bonong di tumindak’ nga’ kiguno potonomon id pomusarahan, bonong okon nopo ko’ opuhod simpod, nga nogi’ kaanu tumolop. Mantad dilo’ kiguno tokou ‘think outside the box’ montok monoibau kobolingkahangan diti pogulu aantakan.
Dr. Maximus (tanga’) guminambar pongingitanan miampai di Dr. Joachim (ko 10 mantad wanan), tongo’ Kumoduo Presiden, tongo’ Timbang Presiden, tongo’ Puru Kounsol Akawas nogi’ oinsanan Monontuduk Agayo id Ramai Kinouliton Toun PBS ko-39.
Kopoburuan amu’ po nasalasai
Dr. Maximus minoboros, kakal ogumu’ i kiguno gonopon id koburuon PBS.
“Poburuon do PBS amu’ po nopongo. Kakal ogumu’ karaja’ di nuru’ do gonopon. Nga’ PBS nopo parti i aiso’ po tuduan di ogirot om pointatap nogi’ aparagat popolombus pomusarahan montokkoundaran Sabah om mogigiyon pogun diti.
“Pomilian Agayo Pogun nokopogulu nosili ponontudukan kumaa oinsanan parti pulitik, om PBS o kosuul no. Kopurimana tokou do sundung pia kikuasa’ solinaid pipiro nohopod toun, amu ilo’ kajamin kalantaion di pointatap sosonginan parti. PBS amu’ kasaga’ osontob ginawo di sokodung do haro, nubasanan karaja agaras, disiplin om pointatap nopo nga’ pili’.
“Mogigiyon mintong, mangadang dati’, om yolo’ lobi ‘kritikal’ nung pitopongon di pogulu diti. Piintangan tokou diolo’ do tikid timpu. We are under their watch at all times.
“Silihon kinosilapan nakalatib sabaagi mangangahak dati’ montok sumili lobi kosonong id pomilian agayo do obontol. Kiguno tokou mamanau midabar di kinoburuon maso-maso. Kiguno tokou manahak poningkanan montok mongingkawas sunduan kopoburuan tokou, miagal di pinoburu’ tokou di toun 1985. Kiguno tokou nogi’ okito koimbayat id mato sukod wagu so they feel welcomed. Amu’ tokou nuru’ modosi diolo’. We should not feel threathened sabab yolo’ nopo nga’ our future, aset kopoburuan tokou,” ka disio.
PBS nopo parti kibantug, ka di Dr. Maximus, i minoboros, id pulitik, prinsip oponsol kopio, kibantug om sopipantang tiso’ om tiso’ suai ko’ popironit koinsanai.
“Pisompuruan diti amu’ insan koputut. Kotilombus tokou do MISOMPURU (BERSATU), okon ko’ montok nopo koundaran PBS om puru dau, nga’ nogi’ id siriba’ i otumbayaan kumaa dati’, lolobi no mogigiyon.”
Dr. Maximus minomohulit do lansanon i haro id PBS do noondo diti nokoutang tinorodok di bagas Presiden, Tan Sri Joseph Pairin Kitingan.
Ka disio, sabaagi Monontuduk Agayo PBS, potilombus isio papanau tonggungan id kapangahakan dati’ koinsanai, om amu’ aanu olimon kinoonuan PBS tuminahan solinaid lobi tolu dekad mantad no do ginaras kopomuruanan om komilaan kopoindalanan disio di osonong, nogi’ sokodung om kinopoburuan mantad oinsanan puru om mononokodung PBS.
“Soira oku nonuan tonggungan montok minonowoli kopomuruanan PBS mantad di Tan Sri Pairin, minamatos oku montok monilombus karaja’ om pinoburu’ disio di osonong. Maan ku tuluko’ batos ku, nga’ montok popoindalan dilo’, momoguno oku sokodung ouli’ om kouhupan mantad tikid tulun id parti PBS. Iti okon ko’ kopoburuan ku sosongulun, toi kopomuruanan Kounsol Takawas. Tikid puru PBS kiguno kumaraja’ agaras montok koundaran pogun Sabah om mogigiyon dau, miampai sunduan pogiagalan om pisompuruan.
“Kanou tokou no tumilombus minggisom montok mamagampot koburuon, kaadangon om kasasangan montok koinsanai mogigiyon Sabah. Miampai angkab om karaja’ agaras tokou, kanou tokou monuridong timpu dumontol di lobi kosonong montok pogun diti. Kounsikohan kinouliton toun Parti Bersatu Sabah di ko-39! Maha’ daa pamanahan tokou id toguang poinponu’ di tuwa’ om kalantaion. Tilombus no misompuru, popoburu’, om kinaangayan! Toririmo sorohon do PBS NOPO NGA’ YOKOYU, OM YOKOYU NOPO NGA’ PBS (PBS is YOU, YOU are PBS).
“OTOBOI, OTIU’ om MISOMPURU – ilo’ no motto tokou montok mamagampot sindikoton om tuduan PBS. Kainou toinsanan papalahat boros keramat parti tokou.”
