Hajiji pinopowonsoi gimik kopoimagananFestival Koubasanan Rumpun Bajausama Sabah id Lintuhun Longkod Koubasanan Rumpun Bajausama, Kampung Lok Batik, di tadau baino’.
TUARAN: Projik Koburuon Sistem Pemetaan Koubasanan Osompuru Pogun Sabah om Projik Pogintongan Koponginsonongan Linimput Upis Laid Upis Surupukaraja’ Kotundunan i pinolulus do Koporintaan Pogun do toun diti, wookon inggisaman i minaan onuo’ montok mononduli’ gompi’ om mongumolig koubasanan sabaagi kokitanan kinopongingiyonon pogun diti.
Boyoon Montiri, Datuk Seri Haji Hajiji Haji Noor minoboros, goduduo projik wagu dilo’ pinolulus id siriba’ Pogintongan Separuh Penggal Palan Malaysia Ko-12 (RMK12).
Ka disio, soginumu’ RM2 riong pinoobi’ montok projik koburuon Sistem Pemetaan Koubasanan Osompuru Pogun Sabah naamot pogintongan Ponginsonongan Linimput Upis Laid Upis Surupukaraja’ Kotundunan kopohompit kopoobian soginumu’ RM200,000.
“Projik pemetaan diti kituduan poposimban karalano’ koponguludan kointalangan koubasanan tinaru Sabah kumaa sistem kointalangan doun kaawagu miampai Palan Pendigitalan Koporintaan.
“Pogintongan dilo’ nopo nga’ pikikiro kopokito koburuon kawagu linimput kisusuyan kahandaman – Upis Boritish North Borneo Chartered Company i pogulu diti nopupu id kinotutudan.
“Linimput diti nga’ kituduan momogompi’ tonduli’ om mongumolig linimput kisusuyan kahandaman, suai ko’ kosili galeri seni koubasanan i oponsol id Sabah. Goduduo projik diti nopo projik wagu om onuan tonggungan kumaa Kotinanan Koubasanan Pogun Sabah,” ka disio id Ramai Kinopoimaganan Festival Koubasanan Rumpun Bajausama Sabah id Lintuhun Longkod Koubasanan Rumpun Bajausama, Kampung Lok Batik, do hiti, di tadau baino’.
Sawo di Boyoon Montiri, Datin Hajah Juliah Salag pinapatahak tutungkap bontugan Ratu Serimpak 2024 kuminaa di Nur Sharmayza Hanim Samsuddin mantad Lahad Datu id ramai kinopoimaganan Festival Koubasanan Rumpun Bajausama Sabah id Lintuhun Longkod Koubasanan Rumpun Bajausama, Kampung Lok Batik, di tadau baino’.
Hajiji minoboros, mogisusuai inggisaman winonsoi koporintaan montok papasaga’ ginumu’ tutumombnului kumaa Sabah i pikikiro kosigampot tolu riong tulun do toun diti, aanu monigampot.
Ka disio, suai ko’ kesenian om koubasanan, produk ponombuluyan miagal Ponombuluyan Mimpau Mogigiyon nopo nga’ bohogian ekoponombuluyan i nakaanu pomuginawaan mantad mogisusuai nayatan mogigiyon nokoiyonon om sompomogunan.
Nunsub po nogi’ disio tongo’ koisaan tinaru id pogun diti tumilombus popoburu’ om papabantug koubasanan tinaru om produk ponombuluyan mimpau mogigiyon id koiyonon sompoopori, suai ko’ misokodung papagaras om mononduli’ gompi’ tungkusan koubasanan tinaru Sabah.
Hajiji minoboros, kosuulon om kolumison Sabah i kiharo kopogisusuaian tungkusan, tinaru, koubasanan om sinakagon, nopo nga’ posunduran oponsol sabaagi pongimbayat tutumombului om kiguno tilombuson ogompi’ nogi’ oumiligan sabaagi kokitanan kinopogigiyonon mogigiyon pogun diti.
Isio po nogi’ Presiden Koisaan Rumpun Bajausama Sabah lumansan Festival Koubasanan Rumpun Bajausama Sabah i nokoindalan solinaid apat tadau pointonod di tadau Minggu, kosili koiyonon montok momogompi’ tonduli’ tataba’ koubasanan id pogun diti.
“Ilo’ po nogi’ kopiongoi di tuduan kinopongonjuran festival diti ilo’ nopo montok momogompi’ tonduli’ om papabantug koubasanan koubasanan nogi’ popogirot sunduan piobpinoian id nayatan mogigiyon nokoiyonon.
“Festival diti i nokosuang doid kalendar ponombuluyan, okon nopo ko’ notindapou di rampun Bajausama nga nogi’ rinamai di oinsanan nayatan mogigiyon orukut tinaru om sinakagon doid pogun diti,” ka disio.
Minoboros isio, festival dilo’ nga’ kosili nogi’ koiyonon i kopongimbayat kororohian sukod wagu gumompit id mogisuai ababayan kesenian om koubasanan rampun Bajausama id pogun diti.
