Pinolombus taru Rukun Negara.
KOTA KINABALU: Mogigiyon pinokianu do amu’ aampawong di pomusarahan araat karait Sistem Pangkalan Data Utama (PADU).
Luguan Potunud Koupisan Kopointalangan Malaysia (JaPen) Datuk Mohd. Sukari Ab. Hamid minoboros, PADU nopo nga’ laang mantad koporintaan montok monguhup mogigiyon.
“PADU nopo nga’ angkab osonong Koporintaan Madani mooi do oinsanan mogigiyon amu’ oiduanan mantad kopomoromitan ponguhupan toi pongumoligan sosial nung kosudong.
“Nga’, mogigiyon noondo asaru’ aampawong kumaa pomusarahan di amu’ kohunung gama-gama’ adalaan poinbanta’ do mogisusuai pawaya’an media sosial.
“Mogigiyon kosuul no kukumaraja’ koporintaan kiguno papatantu’ nunu-nunu kointalangan di aramit nopo nga’ mantad intodonon di aanu ponungkayanan.
“Forum diti tadau baino’ ogumu’ minanahak kopointalangan di kiguno kosuul no kumaa sitaf Koupisan Kopointalangan mooi do tumilombus popoindalan kopointalangan karait sistem PADU diti kumaa mogigiyon,” ka disio ontok pinopoimagon “Sesi Forum PADU: Ke Arah Kelestarian, Kesejahteraan dan Kemajuan Rakyat” id Univositi Malaysia Sabah (UMS), di tadau Kotolu.
Tumanud disio, JaPen miampai do koupisan om kotinanan id siriba’ Komontirian Piromutan tumilombus misokodung miampai Koupisan Perangkaan Malaysia id kapatayadan om kopointutunan sistem PADU kumaa mogigiyon.
“Kogunoon om tonggungan kopio do JaPen nga’ montok poporikot kointalangan om popointalang tongo’ katatapan koporintaan kumaa mogigiyon.
“Mogisusuai ababayan maan tilombuso’ popoindalan do JaPen okon nopo ko’ karait do PADU nga nogi’ koinsanai katatapan om kointalangan koporintaan porikoton miampai poinbuntuk,” ka disio kawagu.
Kalansanan disio mooi do ababayan forum i pinoindalan kapanahak toilaan om kopoilaan di lobi kotopot miampai mitilombus kumaa tongo’ tutumanud potilombus dino aanu papatahak kumaa tulun ginumuan.
Nokotindapou nogi’, Kumoduo Potunud Piromutan Strategik JaPen, Suwadi Guliling; Potunud Bohogian Gerak Saraf om Ponguludan Hal (GSPI), Mohd. Rizal Hashim; Potunud Bohogian Surupukaraja’ Piromutan om Koburuon Mogigiyon (PKPM), Erwin Khairul Ahmad; Potunud Perangkaan Malaysia Pogun Sabah, Muhammad Amri Idris; Potunud Kopointalangan Sabah, Jainisah Mohd. Noor; Potunud Koupisan Piromutan Mogigiyon Zon Sabah, Milus Alu om Kumoduo Potunud Kopointalangan Sabah, Supian Musa.
