Hajiji guminambar miampai wookon puru mongingia’ i nokoindapou id Ramai Apresiasi Ponguludan Sikul (MAPenS) Upis Balajaran Watas Tuaran.
KOTA KINABALU: Koporintaan Pogun tumilombus popoobi’ bajet di agayo montok papatantu’ mogigiyon Sabah kaanu balajaran di ogonop id pogun diti, ka di Boyoon Montiri (KM), Datuk Seri Haji Hajiji Haji Noor.
Minoboros isio, mogisusuai inggisaman ponguhupan balajaran pinosodia’ do koporintaan pogun montok papagaras naangayan balajaran id Sabah, woookn dilo’ soginumu’ RM101 riong montok sikulasip om dermasiswa kumaa susumikul i mongoput pinsingilaan kumaa nayatan lobi kasawat, do toun diti.
“Pokionuon ku oinsanan mongingia’ tumilombus poposurat kalantaion, kisunduan om pokito nubasanan karaja’ kinaangayan akawas montok mongimbulai ‘modal insan’ i notudukan om kaanu monokitopong id nayatan sompomogunan,” ka disio ontok pinopoimagon Ramai Apresiasi Ponguludan Sikul (MAPenS) Upis Balajaran Watas Tuaran Toun 2023 i pinapanau id Klagan Regency, do hiti, di tadau baino’.
Pinopolombus angkab dilo’, minoboros isio, iti sabab no do pomogunan babaino’ diti monugat modal insan i kiginawo ogirot om kikalantaion mooi do kaanu tumonggoi monuridong pogun tinaru.
“Koburuon balajaran toririmo onuan koposuulan do koporintaan pogun. Iti sabab no do balajaran oponsol montok monimban konosipan tanak tinaru. Iti kopiongoi di Palan Koburuon Hontolon Sabah Maju Jaya (SMJ) hinombo do koburuon modal insan wookon tingkananon do Koporintaan Pogun.
“Kohondot dilo’, tonggungan om kinouhupan mongingia’ oponsol kopio om kirati id kopotontuan sukod wagu di haro kaanu momogonop koinsanai liwang om kosiwatan di haro potilombus dino koponoguang nunu nopo kaantaban di rumikot.
“Mantad dilo’, unsubon ku mooi do puru balajaran id pogun diti, kosuul no id Tuaran do popowonsoi kosimbuaton kosimbanon om koponginsonongan montok posindak naangayan balajaran kaamapi no pogogoyuon susumikul id sikul sompoopori,” ka disio.
Hajiji tinanud di Potunud Koupisan Balajaran Sabah, Datuk Raisin Saidin (koduo, gibang) pinapatahak Gaa’ Tokoh Kopomuruanan Ponguludan Balajaran PPD Tuaran kuminaa di Datuk Tah Niah Haji Jaman kopihondot id Ramai Apresiasi Ponguludan Sikul (MAPenS) Upis Balajaran Watas Tuaran.
Karait do ababayan dilo’, Boyoon Montiri minoboros, Koporintaan Pogun tumilombus monokodung koinsanai ababayan i kopohimagon kinouhupan mongingia’ id pogun diti.
Kohondot dilo, minoboros isio, kinopoindalanan MAPenS Upis Balajaran Watas Tuaran Toun 2023 kosudong kopio di tingkananon dilo’ ilo’ nopo nga’ manahak kapamagatangan om kopongokunan kumaa kinosonongon ponguludan sikul om tonggungan tongo’ mongingia’.
“Kalansanan ku gaa’ diti kosili pongunsub sunduan montok tumilombus minggisom om manahak kouhupan di bobos soonong kumaa koburuon balajaran id watas diti.
“Id timpu di miagal, puru mongingia’ kiguno tilombus minggisom popouhup ginoris montok mongimbulai modal insan di kiharo ginaras tinan di akawas om kaanu monigampot angkab nogi’ iman-imanon pomogunon. Tonggungan mongingia’ kaanu popoinggayo kosiwatan, popointanga’ kabaahan om komilaan tongo’ susumikul,” ka disio.
Hajiji minooi intong id pokikitanan kopihondot id Ramai Apresiasi Ponguludan Sikul (MAPenS) Upis Balajaran Watas Tuaran.
Hajiji minoboros, Koporintaan Pogun nga’ tumilombus misokodung miampai Pisompuruan id inggisaman mongingkawas koburuon balajaran id pogun diti.
Karait do naangayan kopoindalanan tongo’ sikul nakalaid id pogun diti, minoboros isio, karaja’ monginsonong sikul nakalaid do noondo diti mamaso poindalanon.
“Oinsanan inggisaman diti kituduan manahak kosimbayanan kumaa susumikul om mongingia’,” ka disio.
