Makhzan (kaapat, gibang) ruminamit tandamato mantad songulun poopokito MCS Ranau.
RANAU: Pakakaraja’ koporintaan Pisompuruan id Sabah nunsub do rumojistor id Sistem Pangkalan Data Utama (PADU) solalaid do ko 30tw Kotolu diti.
Monunurat Pisompuruan Sabah, datuk Makhzan Mahyuddin minoboros duo puruankuasa’ tinuridong sabaagi inggisaman montok poporojistor soginumu’ 1.76 riong tulun id poliliput Sabah.
“Suai ko’ surupukaraja’ kaunter ‘fizikal’ Koupisan Perangkaan Malaysia (DOSM) id Mobile Community Services (MCS), momoguno tokou nogi’ do Longkod Ikonomi Digital (PEDI) om tongo’ kotinanan pisompuruan miagal Koupisan Kopointalangan montok koporojistoran PADU.
“Montok nayatan koupisan pisompuruan nopo, tinuridong puruankuasa’ montok poporojistor sitaf koporintaan om minggu’ tiso’ tumimpuun mindalan montok papatantu’ koporojistoran PADU id Sabah kosigampot rikoton pinatatantu’ gisom koompokon tulan Kotolu 2024.
“Puruankuasa’ kapaampai do upis Monunurat Pisompuruan Sabah, Koupisan Perangkaan om monijor intodonon ngaawi’ tulun koinsanai koupisan pisompuruan nogi’ pogun Sabah montok papatantu’ sitaf koporintaan korojistor PADU,” ka disio soira’ rinubaan id ababayan MCS doid SK Tampios, Ranau, di tadau Ko’onom.
Tumanud kointalangan DOSM, haro soginumu’ 120 noribu pakakaraja’ koporintaan pisompuruan om pogun id Sabah imampai lobi 10 noribu nokorojistor doid PADU.
