Rafidah (wanan) minananud di Monunurat Pisompuruan Sabah, Datuk Makhzan Mahyuddin (koduo, wanan) kuminakap id ‘reruai’ doid MCS SK Tampios.
RANAU: Perbendaharaan Malaysia Sabah (PMS) momorikot kotonudan 20,000 tutumombului Ababayan Surupukaraja’ Komuniti Maapanau (MCS) do toun diti.
Upisor Kousinan Pisompuruan Sabah PMS, Rafidah Datu Derin minoboros montok toun 2024, Komontirian Kousinan Malaysia maya’ PMS mamalan kopoindalanan sokukuri’ 12 ababayan id mogisusuai kinoiyonon.
“Di toun 2023, MCS nokoindalan id 12 kinoiyonon miampai kinotonudan lobi 90 kotinanan koporintaan om okon koporintaan nogi’ nokoposurat kinorikotan 9 noribu tutumombului do koinsanai.
“MCS mogowit sunduan popoingubas surupukaraja’ mooi do aiso’ puru mogigiyon i oiduanan id koonuan piromutan om inggisaman i pinahabar id Bajet 2024,” ka disio soira’ rinubaan id SK Tampios, Ranau i nosili kinoiyonon kumoiso’ MCS toun diti.
MCS toi ‘Mobile Community Services’ nopo nga’ iso’ mantad inggisaman koporintaan miampai pogisokodungan montok popoinsomok mogigiyon kumaa mogisusuai ponit surupukaraja’ id koiyonon kosuul no id watas labus kakadayan om poonsokid i kotoguang do tongo’ kobolingkahangan kopiromutan.
Surupukaraja’ i pinosodia’ kaampai no koporojistoran Sistem Pangkalan Data Utama (PADU) do Koupisan Perangkaan Malaysia (DOSM), kaunter surupukaraja’ ponontudukan, kolidasana, pakarajaan, balajaran, kopongilagan kopomusalaan om kotundunan.
