Haji Hajiji Haji Noor
KOTA KINABALU: Boyoon Montiri (KM), Datuk Seri Haji Hajiji Haji Noor minokianu mogigiyon montok toinsanan sabaagi iso’ mogigiyon osompuru mongunsikou pogisusuaian om kotumbayaan, amu’ monimud nigitan ugama’ om ningkakaton diolo’.
Minoboros isio, iti kopiongoi di tonggungan Koporintaan Pogun montok papatantu’ pisompuruan, piuludan tinaru om pogihunungan id ugama’ kotilombus ogirot.
“Kobolingkahangan monimbayag kopurimanan ugama’ om tinaru momiraag nopo piuludan om pogihunungan i popuriman dati,” ka disio id pason Krismas 2023.
“Id sunduan Krismas, kanou tokou no poposiwat okuri’ timpu momusorou pogiagalan i solinaid diti nokoposompuru mogigiyon om potilombus moningkanan montok monginggirot koyuyuon ngaawi’ diti,” ka disio kawagu.
Boyoon Montiri nga’ minamason nogi’ tulun ginumuan do maganu laang mingat-ingat nosusuhut kinosimbuaton kes Covid-19.
“Kes Covid-19 mumu’-gumu’, om unsubon ku yati’ ngaawi do monidsorou om maganu laang mingat-ingat – tonudon koburision di osonong, piinsoduan sosial om monontokop wuros id koiyonon di osolot montok manalob koinsawaton dilo’,” ka di Hajiji.
Kalansanan disio Krismas koowit barakat om kounsikohan kumaa paganakan om oinsanan i mamaramai dilo’, miampai minamason kounsikohan Tadau Krismas.
