Hajiji (kolimo, gibang) guminambar miampai alumni kelas kumoiso’ toun 1963 Native Volunteer School Bundung id Ramai Kapamaramaian Jubli Intan 60 Toun Sikul Kabansaan (SK) Bundung Tuaran.
TUARAN: Koporintasan Pogun manahak koposuulan kumaa balajaran montok mongimbulai ‘modal insan’ di kiginoris tumopong, kikomilaan om kinaangayan akawas, ka di Boyoon Montiri, Datuk Seri Haji Hajiji Haji Noor.
Ka disio, tonggungan koporintaan nga’ kopiongoi di Palan Koburuon Sabah Maju Jaya (SMJ) i poposili Kopoburuan Modal Insan om Kasasanangan Mogigiyon sabaagi tingkananon koduo palan dilo’.
Mantad no dilo’ ka disio, ogumu’ inggisaman i pinointutunan disio om pinatahak kumaa susumikul pogun diti mantad nayatan sikul osiriba’, mananga’ gisom kotinanan pinsingilaan akawas (IPT) montok papatantu’ diolo’ koponilombus pinsingilaan gisom rontob lobi kasawat.
Minoboros isio, koinsanai inggisaman dilo’ montok nopo monguhup om papatantu’ kalantaion tanganaak mantad balajaran, sabba yolo’ nopo nga’ modal insan di oponsol kopio om gunoon kopio montok mogowit pogun diti kumaa rontob lobi koburu’.
Hajiji (tanga’) miampai Montiri Koburuon Labus Kakadayan, Datuk Jahid Jahim (koduo, gibang), Molohingon Mongingia’ SK Bundung, Grace Subramaniam om tombului suai minomutul tindalam kopihondot pinamaramaian Jubli Intan Sikul Kabansaan Bundung Tuaran.
“Koporintaan nga’ papatantu’ nogi’ tangaanak i potuu id kakadayan toi labus kakadayan pogun diti kaanu kaadangon piromutan balajaran di ogonop miamapi koyuyuon sikul di osonongo m osimbayan.
“Maya’ no do toilaan, komilaan om balajaran di akawas, kaanu yolo’ tumopong om kalantoi, potilombus dino kouhup kumaa koburuon mogigiyon om pogun Sabah o kosuul no.
“Koporintaan Pogun nga’ tumilombus monginggirot po do kopoburuon modal insan miampai koposodiaan kopoobian kousinan RM474.55 riong do toun tiso’, montok popoindalan mogisusuai ababayan wookon dilo’ kapamapai balajaran om pingludaan,” ka disio id Ramai Kapamaramaian Jubli Intan 60 Toun Sikul Kabansaan (SK) Bundung, do hiti di tadau baino’.
Karait di sikul nakalaid id Sabah, Hajiji minoboros Koporintaan Pisompuruan id siriba’ buruanon di Luguan Montiri, Datuk Seri Anwar Ibrahim manahak koposuulan montok monginsonong kosusukupan om kogogonopan sikul ngaawi dilo’.
Hajiji (tanga’) tinanud di Montiri Koburuon Labus Kakadayan, Datuk Jahid Jahim pinopowonsoi gimik kinopoimaganan kinapamaramaian Jubli Intan Sikul Kabansaan Bundung Tuaran.
Minamason nogi’ isio kumaa molohing mooi papatantu’ tanganaak kaanu balajaran di osonong, om amu’ popologos diolo’ oburunsut di koulalaho’ om koyuyuon araat i kopongumpadan koposion om timpu dumontol diolo’.
Kopiongoi di tinuo Jubli Intan SK Bundung, mokianu i Hajiji kapamaramaian dilo’ kosili ponokodung om posindak sunduan kumaa koinsanai puru sikul montok tumilombus mongimbulai lobi kogumu’ modal insan di kalantoi mantad sunduk akademik om kinoulunan, nogi’ umampai popoburu’ pogun diti do timpu dumontol.
Pinapahabar nogi’ isio kopoobian soginumu’ RM200,000 montok monguhup monginsonong pipiro kogogonopan id SK Bundung i kitinuo no do 60 toun, om pinosompini’ sabaagi Sikul Okuri’ Susumikul (SKM) labus kakadayan.
