Dr. Joachim (kaapat, gibang) miampai di Reindy pinopokito setifikit KAMLOBA id balai raya Kg. Lobou Baru, di tadau baino’.
RANAU: Kumoduo Boyoon Montiri II i po nogi’ ADUN Kundasang, Datuk Seri Dr. Joachim Gunsalam minongunsub sukod wagu kaampai id watas diti do minsingilo om minturompus boros songkosuayan suai ko’ boros kabansaan om boros sandad.
Natag disio yolo’ minsingilo om minturompus sokukuri’ iso’ boros songkosuayan suai ko’ Boros Inggilis toi ko’ Boros Jipun, Jerman, Korea toi Cina.
Ka disio, tongo’ boros songkosuayan diti kiharo tiknologi di lobi kaawagu i opinsingilaan nung koilo nodi boros diolo’.
“Ogumu’ ‘tourist’ (tutumombului) mantad pomogunan suai, om pomogunon nokoburu’ mantad sunduk tiknologi… mantad dilo’, amu’ sala’ dati’ minturompus boros diolo’ diti,” ka disio id Ramai Kopoingkawasan Ikonomi om Ramai Kinopoimaganan Kelab Anak Muda Kampung Lobou Baru (KAMLOBA) id balai raya kampung dilo’ doros hiti di baino’.
Dr. Joachim (kolimo, gibang) guminambar pongingitanan miampai puru KAMLOBA nogi’ mogigiyon Kampung Lobou Baru.
Dr. Joachim po nogi’ Montiri Koporintaan Koiyonon om Pomuwalaian minamaramit osonong nogi’ inggisaman mongingkawas ikonomi mogigiyon kampung om komulakan Kampung Lobou Baru maya’ ababayan i pinaanjur dilo’.
Oondos kopio isio haro nayatan sukod wagu diti i wookon graduan minampai tulun kampung om minanahak ponomborosan ponontuudkan kumaa sukod wagu i kakal songinsikul.
“Tumilombus tokou monokodung poinponu’ inggisaman diti,” ka disio.
Ontok tadau miagal, Dr. Joachim po nogi’ Kumoduo Presiden Parti Bersatu Sabah (PBS) pinopoindalan nogi’ do ponokotanda’ kapatahakan kunci lintuhun mini Kironas id Ababayan Jelajah Paganakan PBS.
Lintuhun diti kapanahak koundaran kumaa lobi 900 mogigiyon duo kampung ilo’ nopo nga’ Kg. Kirokot om Kg. Kilanas Baru.
Pinapatahak nogi’ isio ponguhupan 100 timpohon kumaa lintuhun dilo’ nogi’ ponguhupan bakul takanon kumaa mogigiyon di momoguno.
Dr. Joachim suminain plak lintuhun mini Kironas katalib pinopoindalan ponokotanda’ kinapatahakan kunci lintuhun wagu dilo’.
Dr. Joachim minamaramit nogi’ upalai kosompuruan wagu parti mantad lobi 60 tulun i suminompuru raan parti dilo’ do hilo’.
Nokotindapou nogi’ i Monunurat Pulitik kumaa Kumoduo Boyoon Montiri II, Yubidi Gompoyo; Luguan Mamasok Pogun (KAN) Lintuhun Undangan Pogun (DUN) Kundasang, Dominic Ghani; Ponorikohon KAMLOBA, Riendy Waddin; Mananamong KAMLOBA po nogi’ Upisor Pinotomod kumaa Montiri Kousinan, Sharin Mujin; Upisor e-Kasih Watas Ranau, Samdin Rijin; Ponorikohon JKKK Kg. Kirokot, Jainol Sutirin; Ponorikohon JKKK Kg. Kilanas Baru, Denius Usor, sitaf UPPM DUN Kundasang nogi’ puru PBS raan Kirokot.
