Dr. Joachim miniboros miampai di Kumoduo Boyoon Montiri po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan id pitimungan DUN di tadau baino’.
KOTA KINABALU: Kotinanan Koburuon Pomuwalaian om Kakadayan (LPPB) masaan aparagat monuridong soginumu’ 27 unit walai gatang osiriba’ id Bandar Baharu Ulu Dusun, Batu 32 “Check Point” sabaagi ponokodung kumaa kosunion sosio ikonomi id koiyonon dilo’.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, karaja’ kapamawaalan walai dilo’ do gisom noondo diti nokosigampot 98 pihatus om pikikiro opongo poinponu’ do koompokon toun diti.
Ka disio, gisom noondo diti Sedcovest Sdn. Bhd. om LPPB no i pinopoburu’ koiyonon di pinoobi’ maya’ koponuridongan R & R / Gerai MPPB Sedcovest om Ababayan Pomuwalaian Ginumuan Gatang Osiriba’ (PAKR) id kakadayan wagu dilo’.
“Gerai Sedcovest nopongo nodi toun 2005 om nokoindalan poinponu’,” ka disio kuminaa di Datuk Suhaimi Haji Nasir (ADUN Sinili) i minuhot koyuon kaawagu projik kopoburuan kakadayan wagu dilo’ i pinoindalan do LPPB; om songkuro ginumu’ koupisan/kotinanan koporintaan i pinoobian koiyonon id kakadayan dilo’ i nokopoindalan kopoburuan toi linimput id pitimungan Walai Undangan Pogun (DUN) do hiti di tadau baino’.
Dr. Joachim minoboros, LPPB sabaagi kotinanan popoindalan tongo’ kakadayan wagu id pototongkop pogun Sabah id siriba’ Enakmen LPPB No.20 Toun 1981 miampai koupisan/kotinanan Koporintaan Pogun om Pisompuruan i pinoobian koiyonon id kakadayan wagu Ulu Dusun nakapamalan om masaan popoindalan tongo’ ababayan koburuon miampai monuntud tumanud di kolulusan kousinan id Palan Limo Toun Malaysia.
Minoboros isio, koupisan/kotinanan koporintaan i pinoobian koiyonon, koupisan/kotinanan Koporintaan Pogun toi Pisompuruan i pinoobian koiyonon id kakadayan wagu diti nopo nga’ miagal do Kounsol Kakadayan Sandakan (MPS), Sedcovest Holding Sdn. Bhd. (Gerai Mamasok), Perkara Realty Sdn. Bhd. (Kadai Sosio Ikonomi Mamasok), Balai Bomba om Monumpasi, Balai Pulis, Kolinik Kolidasan, Koupisan hal Ugama’ Islam Pogun Sabah (Jheains), Koupisan Surupukaraja’ Pembentungan Pogun Sabah (JPP), Sabah Electricity Sdn. Bhd. (SESB) om koiyonon pinoopi’ koporintaan.
