Ewon pinapatahak geran ponguhupan Tunas Usahawan Belia Bumiputera (TUBE) 9.0 kuminaa dilo songulun mantad mamaramit.
KOTA KINABALU: Montiri Koburuon Mongindapu’ om Koperasi, Datuk Ewon Benedick pinopoimpuun koponguhupan Mamasok MSMEs Financing Initiative (BMFI) kosuul no montok alumni Ababayan Tunas Usahawan Belia Bumiputera (TUBE).
Minoboros isio, BMFI nopo nga’ ponguhupan kousinan wagu pinoindalan do SME Corp miampai sokodung Funding Societies Malaysia (Modalku Ventures Sdn. Bhd.).
“Iti nopo nga’ koponguhupan pinotomod montok Alumni TUBE i kikosiwatan do popoinggayo pongindopuan sompoopori miampai rontob kapaalasan di kosudong ilo’ soginumu’ duo pihatus mantad koponguhupan bobos akawas gisom RM100,000.
“Kalansananku koponguhupan diti kapanahak koundaran kumaa mongindapu’ komulakan kosuul no Alumni TUBE montok popoinggayo po do pongindopuan diolo’,” ka disio soira’ rinubaan magaganu habar katalib pinopoimagon Pirurumaan (Meet & Greet) miampai Alumni TUBE 2023 Sabah doid Hotel Shangri-La Tanjung Aru, do hiti di konihab.
Ewon minoboros, tumanud ruputan PMKS (Perusahaan Mikro Kecil dan Sederhana) id pomogunon diti, PMKS nokopouhup 48 pihatus kumaa siktor guno ginoris mogigiyon pogun diti kamapai no PMKS id Sabah.
“Mantad no dilo’, pinopoimpuun tokou koponguhupan BMFI mooi do siktor PMKS kotilombus koburu’ om kapanahak karaja’ kumaa mogigiyon Malaysia.
“Kopiongoi di kinosimbanon poinggayo i poposuul kopio do ‘inovasi’, tiknologi om pendigitalan, tongo’ komulakan om sukod wagu kiguno lobi ‘proaktif’ montok popoburu’ tinan om lumabus mantad zon osimbayan sabaagi ‘mogigihum pakarajaan’ kumaa ‘mongingimbulai karaja’,” ka disio.
Kohondot dilo ka disio, id Bajet 2024, soginumu’ RM44 bilion pinoobi’ montok kogogonopan kapangalasan om koponguhupan kumaa mongindapu’ PMKS.
“Iti kopokito tonggungan agayo koporintaan montok papatantu’ komponi PMKS kotilombus koburu’ okon nopo ko’ poposodia’ pakarajaan kumaa mogigiyon Malaysia nga’ koponguhup kumaa KDNK potilombus dino poposindak ikonomi pomogunon mooi do lobi koponokitopong om asangal do kaantaban,” ka disio.
Pointonod Ababayan TUBE pinointutunan di toun 2014, soginumu’ RM20.65 riong gatang dagangan naanu pinoposurat do alumni ababayan dilo’.
Miampai poinpuli gatang dagangan notimung di nokosurat do tutumanud TUBE mantad poliliput pomogunon nopo nga’ soginumu’ RM154.38 riong.
Daamot dilo’, soginumu’ 10 komulakan i pinopoindalan mogisusuai pongindopuan id pogun diti nakaramit geran ponguhupan TUBE 9.0 kiginumu’ RM300,000 mantad SME Corp. Malaysia, kotinanan id siriba’ Komontirian Koburuon Mongindapu’ om Koperasi (KUSKOP).
Kinapatahakan geran dilo’ pinoindalan di Ewon i minoboros, mogisusuai kotinanan id siriba’ komontirian disio pinoposodia’ tongo’ skim koponguhupan pinotomod montok koburuon mongingindapu’ komulakan, wookon Ababayan TUBE om Skim Ponguhupan Mobilepreneur i pinoindalan do TEKUN Nasional.
“Id Bajet 2024, Ababayan TUBE nonuan poruntukan soginumu’ RM20 riong. Ababayan diti nopo nga’ inggisaman koporintaan montok mongunsub lobi kogumu’ komulakan umampai doid kaganaan pongindopuan.
“Rikoton do ababayan diti nopo komulakan mamasok kiumur pialatan 18 gisom 30 toun om kiharo kororohian id pongindopuan, ksouul no yolo’ i kiharo sijil komilaan impuunon mantad institusi pintoriningan toi longkod komilaan nokoiyonon.
“Ababayan TUBE miamapi mitilombus monokodung inggisaman kopoburuan komulakan pogun hinombo do pongindopuan nopo nga’ wookon kaganaan tingkananon montok komulakan mumang buru’,” ka disio.
Ewon lumansan, maya’ ababayan diti kopongunsub lobi kogumu’ komulakan umampai kaganaan mongindapu’, pasanganu pongindopuan sondiri om potilombus dino koponsupu’ kosiwatan pakarajaan.
“Kapatahakan geran kumaa tutumanud TUBE Sabah nopo nga’ i bobos akawas tikid timpu ababayan diti do pohoroon om iti kopokito kororohian di akawas komulakan Mamasok Sabah id kaganaan pongindopuan.
“Gisom noondo soginumu’ 7,738 tutumanud TUBE i nokotorining om mantad ginumu’ dilo’ 1,157 (16.4%) nokoporojistor pongindopuan om soginumu’ 2,039 kosiwatan pakarajaan di nowonsoi. Tutumanud TUBE Sabah nga’ nakalantoi nogi’ minaganu gatang dagangan notimung soginumu’ RM20.6 riong,” ka disio.
Minoboros isio, suai ko’ Ababayan TUBE, TEKUN Nasional nga’ kiharo nogi’ skim pinotomod montok komulakan ilo’ nopo nga’ Skim TEKUN Belia Mobileprenuer om id Bajet 2024, pinoobian RM10 riong montok monguhup modal montok diolo’ i kogompit doid kaganaan surupukaraja’ kapaatadan momoguno mutusikol om pawaya’an digital.
“Kousinan RM720 riong nga’ pinotomod nogi’ montok mongunsub koonduan ngaawi’ om komulakan umampai doid pongindpuan di mogisusuai komontirian om kotinanan,” ka disio.
Minoboros isio, KUSKOP tumilombus tumopot om manahak sokodung id inggisaman monguhup komulakan poposindak naangayan om ginayo pongindopuan kumaa nayatan di lobi kasawat.
