Hajiji miampai Speaker Lintuhun Undangan Pogun (DUN) Sabah, Datuk Seri Haji Kadzim M. Yahya om naalap suai guminambar miampai Puru Ngaawi’ Lintuhun Komulakan Sabah (DBS) id pinomupusan Pitimungan DBS, Mitingan Kumoinsan Penggal Kumoiso’ id linimput Lintuhun Undangan Pogun (DUN) Sabah, Kota Kinabalu, di tadau baino’.
KOTA KINABALU: Boyoon Montiri (KM), Datuk Seri Hajiji Haji Noor minagangat toinsanan sukod wagu Sabah tumonggoi miuhup popoburu’ pogun Sabah om oiso’ papalantoi Hontolon Sabah Maju Jaya (SMJ).
Minagangat nogi’ isio di tongo’ Puru Lintuhun Komulakan Sabah (Dewan Belia Sabah – DBS) i pinili’ minongobi’ 73 Lintuhun Undangan Pogun (DUN) Komulakan Pogun Sabah tumilombus manahak sokodung om kouhupan kumaa disio om koombolutan id kopogowitan Sabah lobi koburu’ om komogot.
Ka disio, potontuon disio koporintaan i buruanan disio koitlombus kopomowonsoi i bobos osonong montok pogun om rayat Sabah.
“Pogun Sabah koupusan diti nopo nga’ tonggungan tokou toinsanan. Pogund iti amu’ koburu’ id komoyon di otopot nung kakal haro mogigiyon dau di koindisan id kopoburuan di poindalanon,” ka disio id pinomupusan Pitimungan DBS, Mitingan Kumoinsan Penggal Kumoiso’ id Lintuhun Bangkuasi DUN Sabah, do hiti di tadau baino’.
Pitimungan DBS kumoinsan dilo’ nokoindalan duo tadau minimpuun di ko 30tw gisom 31tw Kohopod 2023, om naampai di 79 Puru DBS, kaampai onom DUN Komulakan sinili. Soginumu’ siam atag di pinili’ montok pinibahasan di tongo’ Puru Lintuhun Komulakan i karait mogisusuai hal kapaampai koponsolon mogigiyon pogun diti kosuul no sukod wagu.
Hajiji om Speaker Lintuhun Undangan Pogun (DUN) Sabah, Datuk Seri Haji Kadzim M. Yahya osuau miampai Puru Ngaawi’ Lintuhun Komulakan Sabah (DBS) id pinomupusan Pitimungan DBS, Mitingan Kumoinsan Penggal Kumoiso’ id linimput Lintuhun Undangan Pogun (DUN) Sabah, Kota Kinabalu, di tadau baino’.
Hajiji minoboros, rinamit disio atag ngaawi’ i pinogibabarasan di Puru DBS om koporintaan pogun mongunsikou koinsanai pomusarahan ‘kritis’, atag om nogi’ tuwa’ pomusarahan tongosonong.
“Oilaan ku mogisusuai kotongoban di nulingad di tongo’ Puru DBS id pinibahasan. Wookon dilo’ karait koburuon kogogonopan labus kakadayan, eko-sistem kopoburuan kopongindopuan Sabah, Ponimbanan Koundangan Pogun kapaampai pomilian ADUN Silihon id nayatan komulaakn i onuon doid nayatan puru DBS, hal koundangan, koumoligan, tinonggungan om sompomogunan, kosiwatan pakarajaan, Sabah Youth Hub i moningkanan kopoburuan komulakan om kopomuruanan om pipiro atag suai.
“Koporintaan Pogun monorisid atag ngaawi’ i nosili koposuulan om kikogunaan montok owiton doid Pitimungan DUN Sabah toi pogibabarasan id nayatan Kabinet Pogun Sabah,” ka disio.
Ka di Hajiji, koporintaan pogun nga’ mintong poinwagat di tikid kaantaban i potoguang do komulakan babaino’ diti lolobi no koyuon koposion katalib Covid-19 i kapaampai koinsanai mogigiyon pogun diti.
Kalansanan disio mantad haro Lintuhun Komulakan kouhup sukod wagu minsingilo mogisusuai toilailaan, koilo om karati kopotutan sabaagi mongungundi’ om mongigit mandat id kopotontuan kopomuruanan pogun om pomogunon do timpu dumontol, nogi’ paaptantu’ komulakan oonuan kopomodulianan poinponu’ nogi’ koilo tonggungan kumaa koponuridongan timpu dumontol pogun om pomogunon.
Ka disio, tonggungan di igitan do Puru DBS montok sesi 2023 – 2024 norikot kawagat om kikaantaban montok no mongimbulai nuludan kopomuruanan sukod wagu di kikabaahan, kikomilaan, kibalajaran om kiharo angkab montok umampai monguhup id kopoburuan pogun diti o kosuul no om pomogunon nogi’.
Minoboros isio, pinonuridongan DBS nopo nga’ angkab om pomusarahan Komontirian Komulakan om Sipoot (KBS) Sabah mantad no do pisokodungan miampai Kounsol Komulakan Sabah om Koupisan Komulakan om Sipoot (P) Sabah.
“Iti kopiongoi di tonggungan om kogunaan KBS Sabah montok popoindalan tongo’ ababayan kopomuruanan id siriba’ Ababayan ‘Inkubator Kopomuruanan Komulakan Sabah (IKEBS)’ i po nogi’ impohon do tongo’ sukod wagu maganu pinsingilaan om pangahakan montok mongimbulai kosiwatan tinan sabaagi komulakan di ‘kompeten’ om kitonggungan montok papalantoi rikoton Hontolon SMJ i pinointutunan do koporintaan babaino’ diti,” ka disio.
