Dr. Joachim (kowalu’, wanan) guminambar miampai wookon puru wagu, kaampai mantad Parti Warisan i suminompuru PBS Kundasang id Kg. Lembah Permai, Kundasang di konihab.
KUNDASANG: Soginumu’ 200 tulun puru wagu kaampai mantad Parti Warisan(Warisan) do hiti suminompuru Parti Bersatu Sabah (PBS) di konihab.
Kumoduo Presiden PBS, Datuk Seri Dr. Joachim Gunsalam minamaramit kinosuangan diolo’ i binuruan di Kaibi Haji Laiman id Ababayan Jelajah Keluarga PBS doid Kampung Lembah Permai, do hiti.
Minamaramit kiniosuangan diolo’, Dr. Joachim po nogi Luguan Bohogian PBS Kundasang minanangkabayahan kumaa diolo’.
“PBS mamaramit kosompuruan wagu dokoyu miampai longon di poungkalad. Aiso’ nunu batos di aanu patahakon. Id PBS, mananud tokou nubasanan ‘we work by example’ (kumaraja’ tokou miampai poombitanan). kumaraja’ tokou om tumilombus mimang buru’, om otumbayaan oku tulun ngaawi’ id siriba’ dati’ kokito. Kohondot dilo’, unsikohon tokou kosuangon puru wagu,” ka disio.
Karait Ababayan Jelajah Keluarga PBS, Dr. Joachim po nogi’ Kumoduo Boyoon Montiri II om Montiri Koporintaan Koiyonon om Pomuwalaian minoboros, pohoroon ilo’ doid tikid watas LIntuhun Undangan Pogun (DUN) Kundasang.
Ka disio, ababayan dilo’ kituduan monginggirot piromutan id pialatan AJK Bohogian om puru ngaawi’ nayatan guas (raan) nogi’ momoruhang kosompuruan wagu.
Dr. Joachim (kaapat, gibang) pinapatahak ponguhupan timpohon kuminaa dilo songulun mobi’ Puruankuasa’ Koburuon om Koumoligan Kampung (JKKK) montok limo kampung id Ababayan Jelajah Keluarga PBS, DUN Kundasang id Kg. Lembah Permai, Kundasang, Ranau.
Wookon di pinoindalan id ababayan dilo’ nopo nga’ minanahak kopointalangan, monginggirot po do kopomuruanan parti, ka disio.
Suai mantad dilo’, PBS papaharo seminar kopomuruanan montok koinsanai Puru Kounsol Akawas, Tinimungan Komulakan om Koonduan sabaagi posodiaan monoguang pomilian agayo pogun (PRN) obontol.
Manangkabahayan nogi’ isio kumaa puru komulakan i suminompuru PBS Kundasang, om minongunsub diolo do tumilombus tumanud koyuyuon maso-maso pulitik pogun diti.
“Yokoyu (komulakan) nopo tumungkus kumaa kopomuruanan parti. Kiguno kou sumosodia’, monorisid poingkuro papagaras kopomuruanan id PBS,” ka disio.
Ounsikou po nogi’ kopio isio sabab ogumu’ sukod wagu suminompuru PBS.
“Iti no i pokimamahaan tokou kopio. Kalansanan dati’ do kada’ indad ponunuhu’ mantad nayatan Bohogian, nga’ id nayatan raan nga’ papamanau karaja’ aparagat.
Dr. Joachim pinopoilang nogi’ ogumu’ naangayan osonong i nosigampot do Koporintaan Gabungan Rakyat Sabah (GRS) noondo diti nung piadangon nodi koporintaan pogulu dilo’.
Naamot dilo’, bagas calon Warisan montok DUN Paginatan i po nogi’ poingampai diolo’ i kososompuru PBS, Dr. Julian Sidin minamarayou PBS i amu’ insan tingkod mantad popoburu’ kopotutan mogigiyon Sabah solinaid 38 toun.
Minoboros isio, PBS nopo songinan parti i ‘dinamik’ om otumbayaan parti diti kopongowit koinsanai puru wagu miampai di puru suai do tumilombus koburu’.
Dr. Joachim pinapatahak nogi’ ponguhupan timpohon wagu kumaa limo Puruankuasa’ Koburuon om Koumoligan Kampung (JKKK) ilo’ nopo nga’ JKKK Lembah Permai, JKKK Kg. Kirokot, JKKK Kg. Kilanas Baru, JKKK Kg. Tebut Timbua om JKKK Kg. Tumbalang.
