Musa Aman
Pakatan Harapan (PH) Sabah minogolim ruputan kabar i popisawit di bagas Boyoon Montiri Sabah Tan Sri Musa Aman om PH Sabah.
Id kointalangan media pinalabus do PH Sabah di tadau baino’ pinopointalang do ruputan kabar i nakatayad id media sosial ki’uhu “Musa Aman akan ketuai PH Sabah?” nokoponinong koburilongon rayat.
“PH Sabah nokotigowo kopio di ruputan kabar dilo’ i nakatayad id media sosial om nokoponinong koburilongon nogi’ kotongoban rayat.
“Pakatan Harapan Sabah miampai ouli’ rolou mogolim hal diti om amu’ insan-insan pibabarasai om pinatantu’ id nombo-nombo mitingan Pakatan Harapan Sabah,” ka do kointalangan dilo’.
PH Sabah minaganu ningkakaton do nombo-nombo kotontuan oponsol i kopohompit do mandat om kotumbayaan rayat mositi’ do timbangon pogulu, sorisidon om imuayon ouli’ rolou id nayatan momuruan PH Sabah.
Ka do kointalangan dilo’, PH Sabah miruba’ om papaharo mitingan id timpu toruhai montok mogiboboros hal diti kaampai no koongoiyon PH Sabah dumontol pomilian agayo pogun i maan pohoroo’.
Kointalangan dilo’ pinalabus koinsanai di tongo’ lansanon PH Sabah yolo’ nopo nga’ ii Ponorikohon PH Sabah Datuk Christina Liew, Presiden UPKO Datuk Ewon Benedick, Ponorikohon PKR Sabah Datuk Sangkar Rasam, Ponorikohon DAP Sabah Datuk Frankie Poon om i Ponorikohon AMANAH Sabah Lahirul Latigu.
Musa Aman nopo nga songulun puru pulitik Sabah i minongigit karaja’ sabaagi Boyoon Montiri Sabah ko-14 minimpuun toun 2003 – 2018.
