Hajiji Haji Noor
KOTA KINABALU: Boyoon Montiri (KM), Datuk Seri Hajiji Haji Noor minonuhu koinsanai komontirian om agensi Koporintaan Pogun montok manahak sokodung oponu’ kumaa agensi pisompuruan i popoindalan projik koburuon id siribha’ ‘Kajian Separuh Penggal’ Palan Malaysia Ko-12 (KSP RMK12).
“Sabah monuau Kajian Separuh Penggal RMK12 Koporintaan Perpaduan ki’uhu “Malaysia MADANI: Mampan, Sejahtera dan Pendapatan Tinggi” i pinawalad di Luguan Montiri, Datuk Seri Anwar Ibrahim id Parlimen di tadau baino’.
“Koporintaan Pogun ounsikou mongilo’ do Koporintaan Pisompuruan tumilombus poposuul koburuon id Sabah maya’ mogisusuai projik om inggisaman wagu id pintangana RM12,” ka disio id iso’ kointalangan do hiti di tadau baino’.
Boyoon Montiri minoboros, sokodung mantad koinsanai komontirian om agensi pogun gunoon montok papatantu’ projik wagu i pinoobi’ id siriba’ KSP om koinsanai projik id siriba’ RMK12 id Sabah aanu momongo tumanud timpu nakatantu’.
Hajiji minoboros, Sabah poinsodia’ papatantu’ ginaras timpu anaru pomorunan ginaras maya’ Palan Hontolon om Palan Induk Tenaga Sabah 2040, i maan poimpuuno’ do amu’ no alaid diti.
Ontok pinapawalad KSP RMK12, Luguan Montiri minoboros, Koporintaan Perpaduan papatahak kuasa’ manamong poinponu’ kumaa pangaba’ gas om lotirik kumaa Sabah dumontol tulan Koiso’ toun tiso’.
Suai ko ilo’, minoboros i Anwar, projik wagu montok monuridong sistem ginoris aanu monginwagu om popomogot grid pangaba’ ginoris id Gugusan Felda Sahabat, Lahad Datu, i magawi’ balanja’ RM195 riong, koindalan, okon nopo ko’ manahak koundaran kumaa rayat id Sabah nga nogi’ id Koiyonon Koumoligan Pinotomod Tisan Kosilahon Sabah (ESSCom).
Koporintaan Pisompuruan popoindalan lobi kogumu’ projuik montok mongundar sikul nangkalaid id Sabah, ka disio, i pinopoilo do 43 projik miagal dilo’ masaan poindalanon id Sabah.
Montok poposodia’ sistem panamangan kolidasan di miadas id Malaysia Kosilahon, Luguan Montiri minoboros, Longkod Raha’ Serantau maan turidongo’ id Sabah, naamot Makmal Kolidasan Ginumuan nogi’ Makmal Sinonong om Koumoligan Takanon maan turidongo’ id Kuching, Sarawak.
Anwar minoboros nogi’, 11 projik padsakaian om logistik wagu pinointutunan montok papatantu’ koburuon kogogonopan pomogunon di po’ompus om kiginirot, kaampai no momonsoi ralan agayo Pan Borneo Sabah Fasa 1B.
