Jamawi (gibang) tuminorungak om miniboros miampai paganakan i pinoiyon id PPS.
TENOM: Montiri Pomutanaman, Ponginsadaan om Pomorunan Akanon po nogi ADUN Melalap, Datuk Jamawi Jaafar di songkosodop nokosiwat kuminakap om minooi intong Longkod Pondolihan Daamot (PPS) nogompitan liyud id watas diti.
Kuminakap isio tolu PPS ilo’ nopo nga’ PPS Walai Koubasanan Kampung Ponontomon, PPS Walai Koubasanan Kampung Pantongan Saga om PPS Walai Koubasanan Kampung Mandalom Lama.
Ka di Jamawi, kotolu-tolu PPS dilo’ nokotimpuun nukaban di jaam ko 3 sodopon songkonihab di Puruankuasa’ Kadaaton Watas Tenom i pinonorikohon di Upisor Watas Tenom, Alexander Liew montok pinopoiyon di tongo’ nogompitan liyud.
Jamawi (wanan) ontok kuminakap PPS om ruminuba’ dilo songulun nogompitan liyud.
“Tongo’ ponguhupan osopung nakatahak no do Koupisan Kotundunan Tenom, Upis Parlimen Tenom, Upis Watas Tenom, Longkod Surupukaraja’ Rayat DUN Melalap om tongo’ kotinanan koporintaan di suai,” ka disio.
Minoboros isio, kinopoikidan ponguhupan ‘bakul’ takanon om waig tinumon kumaa koinsanai nogompitan liud maan tilombuso’ di konihab.
Jamawi (gibang) ontok minooi kakap doid PPS.
Jamawi tinanud di Upisor Watas Tenom, Luguan Watas Tenom, Kumoduo Luguan Pulis Watas Tenom, sitaf Koupisan Kotundunan Tenom, Tinimungan Koumoligan Ginumuan Malaysia (APM) nogi’ sitaf Longkod Surupukaraja’ Rayat DUN Melalap id kinotombuluyan dilo’.
“Osianan oku kopio kumaa di oinsanan nogompitan liyud. Kalansanan do otoboi monoguang pogumbalan kadaaton liyud diti. Minggisom oku monguhup kopio,” ka disio.
