KOTA BELUD: Kumoduo Boyoon Montiri III po nogi’ Montiri Pomorunan, Pongindopuan om Padsakaian (MINDET), Datuk Ewon Benedick minokianu koinsanai koupisan, kotinanan om komponi poinggompit koporintaan (GLC) id siriba’ komontirian dilo’ do papawalad ruputan koundadaon sompoopori montok monoguang kaantakan liyud.
Minoboros isio, laang dilo’ oponsol montok papatantu’ komontirian nogi’ koupisan om kotinanan poinhompit kaanu maganu laang osikap om kiwaya’ id koponoibahan nunu-nunu kaantakan labus kopiimanan.
“Maganu oku ruputan mantad Monunurat Pointatap sabaagi Luguan Surupukaraja’ Ginumuan do po’ompus timpu karait haal diti.
“Ontok tadau Kotolu diti monorikohon oku Mitingan Komontirian i kopohompit oinsanan koupisan, kotinanan om GLC id siriba’ MINDET katalib Mitingan Kabinet.
“Wookon haal agayo i orohian ku do monorisid nopo rontob koundadaon tongo’ koupisan poinhompit id kopoindalanan tonggungan sompoopori, kosuul no kopohompit koyuon liyud i masaan aantakan id pipiro koiyonon do noondo diti,” ka disio soira rinubaan magaganu habar id Ramai Walai Poingukab Krismas om Toun Wagu 2026 Kadamaian doid Lintuhun Kadamaian Square, do hiti, di tadau baino’.
Doondo diti duo longkod poundolihan naamot (PPS) nukaban kapaampai watas Kota Belud om Beaufort.
Ka di Ewon, koyuon liyud id Beaufort nuru’ onuan pomodulianan tu’ pikiikiro dilo’ kosili kobolingkahangan koumoligan kumaa moomoguno surupukaraja koritapi id kinoiyonon dilo’.
Kohondot dilo’, pokionuon disio Koupisan Koritapi Pogun Sabah om tongo’ koupisan poinhompit papalawad ruputan osorisid karait koyuon maso-maso, kaampai laang ngaawi’ ‘mitigasi’ (inggisaman) i masaan om maan poindalano’.
Ka di Ewon, noondo diti amu’ po isio nakaramit ruputan karait kinopourutan surupukaraja’ koritapi.
“Haal diti pibabarasan id mitingan komontirian do tadua Kotolu diti. Poingkuro po tumilombus tokou miontong koyuon liyud id Beaufort.
“Nung haro kogunoon montok popourut surupukaraja’ gama-gama’ waya’an koritapi amu’ oumolig do waya’an, otumbayaan oku do kootusan dilo’ nopo nga’ laang bobos osonong tu’ amu’ tokou maganu risiko,” ka disio.
Pinosotol nogi’ disio do haal koumoligan mositi’ tingkananon kopio do Koupisan Koritapi, sundung pia surupukaraja’ mantad Beaufort kumaa Kota Kinabalu gunoon do ogumu’ susumakai kaampai pakakaraja’ koporintaan i poingkaraja’ id Kota Kinabalu.
Naamot dilo’, lobi 5,000 tulun nokotindapou Pamaramaian Walai Poingukab Krismas om Toun Wagu Kadamaian pinaanjur do MINDET om ADUN Kadamaian dilo’.
Ka di Ewon, ababayan miagal diti nosili impohon oponsol do rumuba’ rayat id Sabah kosuul no mamagatang sokodung po’ompus rayat Kadamaian i minanahak mandat agayo id pomilian agayo katatalib.
“Sabaagi Puru Lintuhun Undangan Pogun (ADUN) Kadamaian, Montiri Pomorunan, Pongindopuan om Padsakaian nogi’ sabaagi lansanon pogun, mongunsikou oku rayat Sabah kosuul no id Kadamaian doid ababayan diti i toririmo poonjuron ku pointonod pinili’ sabaagi mobi’ rayat Kadamaian.
“Ababayan miagal diti kapanahak kosiwatan kumaa dati’ do mogirumo miampai mitilombus, pogirot silaturahim, monginggirot piuludan om papagaras pisompuruan. Iti no impohon kopio i gunoon montok popomogot Sabah,” ka disio.
Ka id Ewon, walai poingukab miagal diti kopotimung rinibuan rayat mantad mogisusuai nantadon kaampai mobi mogisusuai parti pulitik, tongo’ koupisan koporintaan, tongo’ lintuhun pongindopuan nogi’ lalansanon gereja, potilombus dino kopokito sunduan pisompuruan om kopogi’isaan id nayatan mogigiyon.
Minonongkounsikou nogi’ isio kumaa koinsanai rayat Kadamaian tu’ nokorikot minooi pamaramai kararamaian dilo’ sundung pia do rumasam.
“Sundung pia do asapou rasam di kolimpuunon karamaian, amu’ nakatalob ilo’ kinorikotan rinibuan rayat, do ruminikot.
“Iti kapanahak kointalangan do rayat lumansan kopomuruanan di ogirot id kopoburuan Kadamaian nogi’ monilombus tongo’ ababayan kasasanangan rayat,” ka disio.
Minonuau nogi isio poinsonong di kinorikotan tongo’ lansanon mantad parti ngaawi’ sopisuai om pinoposotol do pisuayan pomusarahan nopo nga’ haal noubasanan id kopoindalanan demokrasi, kosuul no ontok pomilian agayo.
“Nga’ soira’ oturidong koporintaan, nuru’ tokou gumuli’ misompuru om miuhup montok koponsolon rayat. Rayat lumansan kopomuruanan i kaanu monompuru, okon ko’ mongurias,” ka disio.
Ka disio kawagu, kopogi’isaan miagal diti nuru’ poinggoyoon okon nopo ko’ id pamaramaian walai poingukab, nga nogi’ maya’ inggisaman suai kaampai mitingan om pibabarasan i koowit kumaa kopoinggirotan pisompuruan kopomuruanan pogun.
Karait haal koponugatan Sabah id Pibatosan Malaysia, pinosotol di Ewon do haal dilo’ okon ko’ tonggungan no do iso’ parti, nga’ tonggungan koporintaan Sabah i nuru’ kopohompit koinsanai parti om oinsnana mobi’ rayat i potuu id nayatan Lintuhun Undangan Pogun (DUN) toi ko’ Parlimen.
“Poinggirot oku popoindalan do nuru’ tokou misompuru montok Sabah,” ka disio.
