Jamawi (tanga) guminambar pongingitanan miampai di Leonard (koduo, gibang) om i Hj. Siraja (koduo, wananan), tombului di suai om nogi’ oinsanan i nokotindapou id pitimungan dilo’.
TUARAN: Montiri Pomutanaman, Ponginsadaan om Pomorunan Akanon (MAFFI), Datuk Jamawi Jaafar manu do kogogonopan sistem pomuwoigan laid id pipiro koiyonon id Sabah insonongan montok monokodung mogigiyon pomutanaman.
Minoboros isio, inggismaan diti oponsol montok papatantu’ tana’ pomutanaman aanu morobuat miampai oumolig om kiwaya’.
“Nokopiboros oku miampai Potunud Koupisan Pomuwoigan om Poluyungan (JPS) do toun diti toi toun tiso’, nuru’ tokou mogihum bajet montok manalasai haal diti,” ka disio i po nogi’ ADUN Melalap.
Jamawi (kotolu, gibang) guminambar pongingitanan katalib pinopoindalan kopoimaganan Pitimungan Upisor Otuo JPS Sabah 2026 dilo.
Ka di Jamawi, inggisaman diti tilombuson sundung pia do nuru’ owiton kumaa nayatan lobi kasawat, kaampai pirubaan miampai Boyoon Montiri toi komontirian poinhompit id nayatan Pisompuruan.
“Osianan tokou di konosipan tongo’ momumutanom tu’ tikid aantakan liyud, tanom diolo’ oumpadan, lolobi no id kokompungan i aiso’ sistem pomuwoigan di osonong. Sundung laang ngaawi’ panapad liyud miagal gabion winonsoi, kakal haro kampung i aiso’ gobion,” ka disio.
Pinosotol disio pomogunaan komilaan, kabaalon om intodonon miampai lobi kiwaya’ montok monoibau kobolingkahangan diti. “Mogigiyon mokianu nopo jominan do intodonon akanon diolo’ amu’ oumpadanan po’ompus toun tu’ pomutanaman nopo nga’ koposion tongo’ mororobuat,” ka disio kawagu.
Minoboros isio, bohogian komontirian tumopot monguhup momutanom mooi do tikid projik kapanahak koundaran atalang kumaa mogigiyon.
Jamawi (tanga’) om Leonard (gibang) minokinongou kopointalangan mantad di Siraja id ababayan dilo’.
Pinopolombus isio haal dilo’ ontok pinopoimagon Pitimungan Upisor Otuo JPS Sabah 2026 id Shangri-La Rasa Ria, i nakapanau mimpuun ko 5tw gisom ko 8tw Koiso’ om notindapou di 120 upisor otuo, kaampai injinior om monguhup injinior mantad longkod upis om upis JPS watas pototongkop Sabah.
Pitimungan tikid toun diti kosili koiyonon mogintong naangayan toun nakatalib, monorisid kinolomogon, monoibau kobolingkahangan agayo nogi’ mamalan ababayan koburuon, kapakarajaan, surupukaraja’ om tinonggungan koupisan.
“Palan osorisid nopo nga’ haal oponsol id koinsanai kopoindalanan ponguludan. Ilo’ kapatantu’ toisoiso’ haal aanu popoindalan miampai oturundus om sondikoton osigampot. JPS, sabaagi koupisan id siriba’ MAFFI i karamit kopoobian koburuon agayo, mositi’ popoindalan koinsanai ababayan miampai pamalanan di oulud,” ka disio.
Jamawi (koduo, gibang) miniboros miampai Upisor JPS i nakaampai pitimungan dilo’ i minimpuun mantad ko 5 gisom ko 8tw Koiso’.
Pinosotol disio nubasanan JPS papaharo pitimungan upiso otuo id kolimpuunon toun kopiongoi di nubasanan ponguludan osonong, montok papatantu’ ababayan koburuon pogun aanu popoindalan tumanud timpu om kapanahak koundaran kumaa rayat.
Nokotindapou nogi’ i Monunurat Pointatap MAFFI, Datuk Leonard Stephen Poyong om Potunud JPS Sabah, Ir. Haji Siraja Haji Bashora.
