Haji Hajiji Haji Noor
KOTA KINABALU: Gabungan Rakyat Sabah (GRS) miboros nung tumanud do Pomilian Agayo Okoro’ (PRK) miindad montok timpohon Parlimen Kinabatangan om Lintuhun Undangan Pogun (DUN) Lamag do ko 24tw Koiso’ obontol.
Boyoon Montiri om Ponorikohon GRS, Datuk Seri Haji Hajiji Haji Noor minoboros, kootusan karait goduduo tindikohon dilo’ kakal id pibabarasan.
“Ilo no i pogibabarasan tokou. Amu’ po nakatantu’, nga’ prinsip dilo’ onuan tokou waya’an,” ka disio.
Pinosotol disio nunu-nunu kootusan tohuri maan wonsoiyo’ mimpau pirundingan om piokunan oinsanan bohogian montok koponsolon rayat om kaadangon pomorintaan pogun.
“Gisom noondo diti, pikiikiro doti’ do amu’ tokou tumanding. Manahak tokou pamantangan om waya’an kumaa parti di nakalantoi, naampapan nogi’ do somboogian yolo’ mantad koporintaan pogun do babaino’.
“Poinsodia’ tokou manahak waya’an om monguhup tambalut parti mooi do kalantoi yolo’ pomilian agayo okoro’ dilo’,” ka disio katalib tuminindapou pitimungan DUN Sabah, di tadau baino’.
Poingkuro po pinosotol di Hajiji, kootusan pohimagon kakal amu’ po nowonsoi tu’ pipiro haal nuru’ pogibabarasan id piomungan dilo’.
“Ponongkibarasan ku po di Presiden UMNO om nogi’ Ponorikohon Barisan Nasional,” ka disio karait do pibabarasan potilombus PRK dilo’.
Kokusungan tindikohon Parlimen Kinabatangan om DUN Lamag naantakan nosusuhut kinoiduan pogun di mongingigit dilo’, Allahyarham Datuk Seri Bung Moktar Radin di kaawagu diti.
