Dr. Joachim (id tohuri, tanga’) guminambar miampai tongo’ mamaramit garan PANTAS id Kg. Tambatuon di tadau baino’.
KOTA BELUD: Kumoduo Boyoon Montiri II, Datuk Seri Dr. Joachim Gunsalam minokianu mogigiyon kampung do amu’ papadagang tana’ tungkusan diolo’, nga’ momogompi’ dilo’ om popoburu’ sabaagi harata’ tungkusan di kigatang kopio.
Minoboros ontok pinapatahak 205 garan Ababayan Ponukatan Tana’ Adat Pogun Sabah (PANTAS) kumaa mogigiyon Kampung Tambatuon do hiti di tadau baino’, ka disio, tana’ nopo nga’ i bobos oponsol id koposion, lolobi no id nayatan mogigiyon Kadazan, Dusun, Murut om Rungus (KDMR).
“Aiso’ i lobi kigatang ko’ mantad pasanganu tana’ sondiri’. Kalansanan ku mogigiyon amu’ papadagang tana’ diti, nga’momoguno dilo’ do poinsonong,” ka disio.
Dr. Joachim i po nogi’ Montiri Koporintaan Koiyonon om Pomuwalaian nga’ minongunsikou nogi’ kumaa Koupisan Tana’ om Monukat (JTU) mantad inggisaman diolo’ minonukat om pinoposodia’ garan ngaawi dilo’ miampai oulud.
Pinosotol disio do kinopoindalanan PANTAS kopohompit no do tana’ di nobuat nga’ aiso’ po garan, om amu’ kopohompit koiyonon i masaan id pigogutan toi pasanganu nombo-nombo bohogian.
“Nung haro pigogutan id toisoiso’ koiyonon, PANTAS amu’ maan poindalano’. Kohondot dilo’, lansanon nayatan kampung miagal Ponorikohon Puruankuasa’ Komogoton om Koumoligan Kampung (JKKK) om Molohingon Kampung papapanau tonggungan oponsol id kopongintutunan tana’ di nobuat do mogigiyon,” ka disio pinopointalang.
Ka disio kawagu, koporintaan toririmo monokodung upalai pointopot i potoguangon rayat, asal po do kaanu sokodung poinponu’ mantad JTU do momogonop kopolulusan.
“Haro mongungupalai i asansagan mindad gisom 10 toun pogulu garan PANTAS kolulus. Mantad dilo’, kalansanan ku kopongupalaian powonsoiyon miampai poingulud om ogonop mooi do karaja’ aanu moginsikap,” ka disio.
Dr. Joachim (poindikau, tanga’) guminambar pongingitanan miampai tongo’ tombului i nokotindapou om mogigiyon Kg. Tambatuon id Ramai Kapatahakan Garan PANTAS, Kg. Tambatuon.
Daamot dilo’, pinosotol disio tonggungan po’ompus koporintaan pogun monguhup rayat sumanganu tana’ sondiri’ maya’ mogisusuai inggisaman om ababayan.
Kohondot dilo’, pinokianu disio mogigiyon kampung do tumilombus monokodung koporintaan Gabungan Rakyat Sabah (GRS) id Pomilian Agayo Pogun (PRN) i pikikiro pohoroon do amu’ no alaid diti.
“Pilion no koporintaan i otootopot monguhup rayat. Isai nopo i poungkakaton do Gabungan Rakyat Sabah, ilo’ i maan tokou sokodungo’,” ka disio.
Nokotindapou nogi’ Potunud JTU, Saat Durasik; ADO Upis Watas Kota Belud, Wahab Hj. Sidek; Lansanon Koburuon Mogigiyon (PPM) N11 Kadamaian, Demis Rumanti; PPM Kadamaian mobi’ di YB Datuk Ewon Benedick, Saimon Watis; Upisor JTU PBU Kota Belud, Pool Rumanti; Luguan Watas, OKK Roslan Duraman; Molohingon Kampung Tambatuon, Kosimin Sulidan; Ponorikohon JKKK, Walbote; Mongungulud Koisaan KOUbasanan Kadazan Dusun (KDCA) Kota Belud, James Muyou; Popoburu’ Mukim Kadamaian, Melon Yaming om Anichlose Kesimin.
